Shillong, March 12, 2022: Adita salrangna Petrol Pump-oniko tangka ra•sekdrae katgipa manderangko East Jaintia Hills a•jani Umlawang song sepango donggipa Ryngsong Shylla-oniko rim•aha ine koborna u•iataha.
Rim•a man•gipa manderangoniko pulisrang AK-47 silai ge•sa, silchi dareni gulirang, atte, mobile phone aro AS-27D-2482 nomboro register ka•gimin motor bike bolsako man•aha.
Rim•a man•gipa manderangara, Bhergaon songni bilsi 37 ong•gipa Bipul Basumatary, Assam Udalgiri songni bilsi 43 ong•gipa Jotish Daimary, Assam Kusung Desa Chirang songni bilsi 35 ong•gipa Shankar Boro, Kamrup Hablakha songni bilsi 33 ong•gipa Fajal Hoque ong•achim.
Ua manderang January 6 tariko Shillong songjinmani petrol pump ge•saoniko tangka gong lak 2.8-ko ra•sekdrae ra•angahachim. Ua apsan dolni manderangan January 11 tariko Khlieriat petrol pump ge•gnioniko tangka gong lak 6-ko ra•sekdraangaha. Uasan ong•aigija ua apsan dolan January 8 tarikoba Ri-Bhoi a•jani 14 Mile-o donggipa petrol pump-oniko tangka gong lak 2.5-ko ra•sekdrae katangaha ine parakataha.
East Jaintia Hills a•jani Suprentindent of Pulis (SP) Jagpal Singh Dhanoa-ni parakatani gitade, ian a•jani pulis dolrangni am•sandianio cheani aro kusini ong•a, maina chinga a•jani pulis dolrangba Khlieriat-o ong•anggipa obostani bidingo sing•sandianirangko dakaha. Indake
March 11 aro 12 walni gisepo pulisrang special operation-ko ong•atenba dos dakgipa manderangko rim•na gita man•aha. Uamang sak 4-ko Rynshong Shylla songoniko rim•na man•aha aro sing•sandianiko dake uamang doloni saksa Fajal Hoque-ko gipin a•dokni pulisrang dakchakanichi Guwahati-oniko rim•ena man•aha.
Ia obostani bidingo aro uamangni gimin talbate ma•sina sing•sandianiko dakengkua ine SP u•iataha.