Tura, September 16, 2022: District Level Students Science Seminar-ko Sukrobar salo Tura Dakopgre-o donggipa SMELC building-o ong•atangaha.
“Basic Science for Sustainable Development. Challenges and Prospect” ia katta bichongo pangchake Seminar-ko ong•atangaha.
Ia Seminar-ko WGH a•jani Education Department ong•atangaha aro iano bang•a skulni Principal-rang, skigiparang aro poraienggipa chatro chatrirang bakko ra•angaha. Unbaksana kamoni neng•take dongenggipa, District School Education Officer (DSEO), Subodh KR Saha ia tom•anio mongsonggipa sokgipa ong•e bakko ra•angaha. Ua jinmana aganprakengon, “An•chingni District Authority-rang chadamberangna uamangni changa sapaniko jinmana mesokna bang•a platform-rang jekai seminar, debate, quiz competition aro uandakgiparangko ra•bae on•ronga. Indakgipa susagrikanirang poraienggipa chadamberangni chanchianirangko baridapata aro nambata gadango pass ka•na gita dakchaka” ine aganangaha.
Don Bosco Kolege, Chemistry Department-ni Senior Professor, Dr. Madhusudhan Saha “An•chingni janggi tanganio Science-ko an•ching salantian nanga aro salantian Physics, Chemistry aro Biology ki•tapko poraienggipa bakrangko jakkala. An•chingni a•gilsako bang•a crisis ong•anirangko nikna gita man•enga. Indake ia crisis-rangko namatna gita United Nations General Assembly-ni ka•rimskarang, 2022 bilsiko “International Year” of Basic Science for Sustainable Development ine donaha. Chasongni kri manderangni seng•ani aro changa sapanirang baririkenga, indiba an•ching a•gilsakni gam jinrang komiangskaenga.
Ua United Nations General Assembly-ni ming 17 goal ba chu•sokatna miksonge donenggipa nisanrangni bidingo aganprakengon, cha•asia ba poverty-ko bon•atna, an•chingni a•gilsakko naljokatna aro saksa sakgipin baksa melie nangrime donganian, uamangni miksongani mitam bakrang ong•a. Science-ni a•selsa an•ching Corona Virus sabisioni naljokna gita tikka su•ani samrangko bikotna man•aha. Science an•ching sakantini janggi tanganio gamchatbegipa mingsa bak ong•a” ine aganangskaha.
Ia tom•anio Subodh KR Saha, Certificate of Appreciation-ko Wiiamnagar, District Science Supervisor aro Government Boys’ Higher Secondary Skulni gitcham Assistant Teacher Samuel K Sangma-na on•angaha. Unbaksana chatro sakgni Habakku R Sangma aro Tengrimbirth R Sangma-na Inspire Manak Exhibition 2019-20 bilsio 8-gipa NLPC Inspire Award-ko man•anina mittelpilani gita certificate of appreciation-ko on•angaha. Uamang ba•ra hanger-ko blower baksa aro tem•na man•gipa tebilko jola gnang tarie mesokangaha. Indake uamangni tarigipa bosturangko Smart Innovation Sector-o 60-gipa ranko donatako man•aha.
Tura-ni District Science Supervisor, CA Sangma aro Jt. Director of School Education aro Literacy Department-ni SEO, Taposh Ch Marak-ba ia tom•anio bakko ra•angaha.