MPYC, Narendra Modi-ni atchiani salko maniani salo Unemployment Day-ko maniangskagen
Williamnagar, Sept 16, 2022: India a•songni Prime Minister Narendra Damodardas Modi-ni bilsi 72 gapaniko ba atchiani salko September 17 tariko maniengon,
Garo Hills Youth Congress aro INC-ni dilgiparang, National Unemployment Day-ko September 17 tarik Sonibar pringni 10:30 bajio Mendiphatar Congress Bhavan-o maniangskagen ine u•iataha.
Meghalaya Pradesh Youth Congress (MPYC)-ni General Secretary Junebirth C.Marak-ni u•iatani gitade, National Unemployment Day (NUD)-ko maniani salo Indian Youth Congress (IYC)-ni dilgiparang a•songni pilak chadamberangko bak ra•china mol•molataha.
Ia National Unemployment Day-ko September 17 tariko manina miksonganiara, Prime Minister Narendra Modi aro Meghalaya a•dokni Skotong Minister Conrad K. Sangma-na Unemployment-ni bidingo mikrakataniko ra•baani ong•a.
Indake ia Program-ko District Youth Congress (DYC)-ni President Timjim K.Momin, MPYC-ni General Secretary Junebirth C.Marak aro MPYC-ni Joint Secretary Tweel K.Marak dilanggen ineba u•iataha.
A•songo kam gri dongenggipa chadamberang, 2014 bilsio unemployment rate 5.44%, 2019 bilsio 5.98% aro 2022 bilsio 7.59 % ong•aha. Indake bilsianti unemployment ba kam gri dongenggipa chadamberang batroroenga ine Junebirth Marak parakataha.
Meghalaya a•doko bang•a poraia matchote kam gri dongenggipa chadamberang neng•nikaniko chagrongenga. Centre for Monitoring Indian Economy (CMEI)-ni report gita August 22 tariko Meghalaya a•dokni Unemployment rate 2.0 % ong•aha. Indake sak lak 2 chadamberangko kam ka•na chol ong•gija dongengako nikna gita man•enga.
Meghalaya sorkari re•angipa bilsi brini gisepo Meghalaya Public Service Commission (MPSC) Recruitment-ko changsaba ong•ata dongkuja. Skangode MPSC Recruitment-ko bilsi gitamprakon ong•ate, porikkako seatrongachim, indiba MDA sorkari chadamberangna cholko on•na sikjani a•sel bang•a chadamberangan poraia matchoteba kam dongna nangenga. Uni a•sel Meghalaya a•doko unemployment rate jagitam ba jadokprakon batroroenga ine MPYC dilgiparang parakataha.
Una agre District Sellection Committee (DSC)-oba apsandake porikka (exam)-ko tik ong•e ra•jaengani a•sel kamna galenggipa candidate-rang porikka sepana performance chu•ongjae man•rongja, indiba porikka segijagiparangsa kamko man•skaenga ine janapataha. Iarangan a•doko unemployment-ko ong•katatenga aro poraiani ba (Education)-ni gamchata (value)-ko gimaatengipa ineba parakataha.