WGH-ni district administration buring bolgrimrangko ripingchina songni manderangko didia

Tura, May 1, 2022: West Garo Hills a•jani District Administration (DA)-ni didiatani gitade, diltugipa buring bolgrimrang jeon bang•a dingtang dingtang rokkomni bolrangan gapachim aro uarang a•ako a•sal ong•atgipa, chiring chibisikrangko tange rakkina dakchakgipa ong•a.Uandakgipa buring bolgrimrang do•o matrangni dongchakram biapba ong•a, uasan ong•aigija songni nokni bi•sarangna namgipa kal•chakani biaprangkoba ong•ata.Ua buring bolgrimrangni palo ka•sin ka•sin bolam biterangko man•gipa bolrangko ge•skana nanga. Songni nokni manderang aro chadamberang pangnan dingtang dingtang rokkomni gamchatgipa bolrang jekai Prap, Bolchim, Bolkasin aro bite cha•na man•gipa jedake Te•brong, Tegatchu aro gipin bolrangko World Environment Day (WED)-ni salosan ong•aigija, gipin salrangoba bolrangko ge•na nanga ine West Garo Hills a•jani District Administration didianagaha.

“Chinga dingtang dingtang rokkomanti bolrangko ge•na aro songko noko rongtal an•tale rakkiani bak gita songni nokni manderangna bol ge•aniko dakchina didienga. Uandake West Garo Hills a•jani ning•o donggipa Rochinpara songni manderang antini bon•kamgipa salo pangnan jinma apsan ku•monge bolrangko ge•enga. Ia apsan dakgipa ja•ku de•aniko gimik songrangon a•bachengatna nangenga, maina batanggipa bilsirango dugapile buring bolgrimrangko nosto ka•aha” ine West Garo Hills a•jani District Administration parakataha.

Uni gimin mikkangchi A•chik a•songni buring bolgrimrangko name ripingangna, bolrangko ge•daprikrikna, do•o matrangni dongchakram biaprangko ripingna aro chiring chibisikrangko tange rakkiangangna District Administration songni manderangko didiangaha.