Tura, April 30, 2022: GSU-CEC,Tura aro Garo Hills-ni dingtang dingtang Zone-rang Sukrobar salo a•dokni Skotong Minister Conrad Sangma-ko gronge lekka see on•angaha.Meghalaya a•dok sorkari soi ka•gimin MoU-ko nipiltaichina mol•molangaha. A•chik-rang skangonin GHADC-o Garo Customary Law (GCL), Seperate Elektoral Roll (SER)-ko tarie on•china dabibaenga aro unbaksana GHADC-o kam ka•enggiparangni man•a nangenggipa dormaharangko jaanti on•china dabienga, indiba sorkari ia dabianirangko knachakja.Uandake da•oba Assam aro Meghalaya a•dokni sima arini kajia golmalko namatna soi ka•gimin MoU-ko nipiltaichina skotong minister-ko mol•molangaha. Una agreba skotong minister mingbonga niamrango pangchake MoU-ko soi ka•aha, uaranga gitcham salrangko nipilatani, manderangni namnikao pangchake, administrative-ni namnikako ra•e, daka rikani ba ethnicity, ong•telaigipa sima ari jekai chiring, chibima aro ro•ongrango pangchake soi ka•aha ine parakataha.
“Batanggimin April 11 tariko Garo Hills gimikni GSU dolrang, bang•a NGO-rang aro Social Organisation-rang bakrime Mallangkona Salbari songni manderangni okamatako man•ne, uamangni ku•rangko jinmana sokatchina dabie tom•bimonganiko ong•atangaha. Mallangkona Salbari songko Skotong Minister Conrad Sangma Assam a•dokna pakwatatahani gimin songni manderang salantian duk mikchi ong•e a•doktang chigatangna ma•ringe donganiko parakaha.
Ua songni manderang skangonin Meghalaya a•dokni ning•osa ga•aka ine sakkiko mesoke, Meghalaya sorkarini ning•o register ka•gimin bang•a lekkarang aro eleksin id-card-rangko mesokaha. Ua songo donggipa Mallang Joypur Border Area Secondary Skulni klas 9 aro klas 10, Meghalaya a•dokni Director of School Education and Literacy Department-ni gita biming segatako man•ne skul kulina rai on•giminba gnang. Uamang songtangko tang•dodapatna Meghalaya sorkarini dingtang dingtang project-rangko Department-ni on•gimin kamrang aro MGNREGS-ni gitaba kamrangko ka•e cha•anirangko mesokaha.
Ia tom•bimonganiko ong•atani salo songni bang•a manderang Meghalaya a•dokoni ma•ekatako man•ne Assam a•dok baksa chapataniko jegale bakko ra•na re•batokaha. Unbaksana West Khasi Hills a•jani KSU aro Nonglang Ma•chongni Hima/Sordarship-ba re•bae bakko ra•angaha” ine GSU parakataha.
Unbaksana West Khasi Hills a•jani Nonglang ma•chongni Hima/Sordarship-ni tom•anio parakani gitade, angni jurisdiction-ni ning•o donggipa a•arang Sixth Schedule-ni ning•o ga•aka, uni gimin sorkari ia a•arangko maming dakeba sing•cheng sanchenga gri cha•ue gipin a•dokchi pakwatatna man•chongmotjawa ine u•iataha.
Apsandake tom•bimonganio Conrad Sangma-ni kamko jegale, Mallangkona Salbari songni bang•a A•chikrang bakko ra•angtokaha. Uamangni u•iatani gitade, Conrad Sangma darangoba sing•cheng sanchenggija an•tangni namnika gita ja•ku de•na man•ja. MoU-o janapgimin niamrangko an•tangan pe•aha ineba matnangaha.
“Mallang Salbari, Malchapara aro Siminaguri song skang chengonin Meghalaya a•doko songdonge bang•a eleksin-rango vote-rangko pu•onenga. Chibima ba chiringrango pangchake a•dok dam gnina a•ako sualna man•jawa ine janapatengon, KHADC-o donggipa map wa•rengko jakkalna nanga. Skango Assam a•dokoni ma•eke Meghalaya a•dokko man•chengaoni bang•a A•chik songrang galchangbaako man•aha aro ia changoba bang•a A•chik songrang Assam a•dokona chapatako man•aha. Chinga GSU a•dok sorkarini kamko raken jegala aro ra•chakna man•chongmotjawa. Chinga A•chik jat skani ma•brangako nikna sikja. Chinga March 29 tariko soi ka•gimin MoU-ko nipiltaichina Skotong Minister-ko mol•molna ska” ineba GSU janapataha.
Indake ong•genchimoba, Sukrobar salo GSU dilgiparangni Skotong Minister, Conrad Sangma-ko gronge agangrikanio chu•sokna man•jaha. Maina Conrad Sangma, 2011 bilsio Congress sorkarian sima ariniko tarie ia songrangko Assam-o napatmanaha, ukosa MoU-o soi ka•aha ine Congress sorkariko dos gale aganaha aro Assam a•dokchi man•anggimin a•arangko Assam sorkari on•kugenma, on•jawaha, uni gimin anga ia MoU-ko nipiltaina man•jawa ine aganchakaniko GSU raken jegalataha.