Tura, December 6, 2022: West Garo Hills a•jani Deputy Commissioner Swapnil Tembe, Monggolbar salni bako Tura songjinmani DRDA buildingo NRLM SGHs Retail Outlet-ko oprake on•angaha.
Ia Retail Outlet-o bang•a Handicraft items ba bosturang, unbaksana West Garo Hills a•jani ning•o donggipa Rongram, Dalu, Selsella, Gambegre, Dadenggre, Tikrikkila, Demdema C&RD Block-ni me•chik dolrang ba Self Help Group (SHG)-rangni rokomanti cha•anirangko tarie palanirangko dakangaha. Rokomanti bosturang jekai wa•ani bosturang, achar, chips, candies, biscuits aro uandakgipa bosturangko dingtang dingtang counter-rango palangaha.
“NRLM pilak songni manderangni bading chiwalanio dakchakaniko on•na miksongani ong•a. Self Help Group (SHG)-rangna rokomanti bosturangko aro cha•anirangko tarina skian baksa uarangko bajar antirango pale sim•e bading chiwalaniko dal•atna skie on•ani ong•a. Anga bang•a Department-rang, ia Retail Outlet-oniko gift hamper ba uandakgipa bosturangko breenba SHG-rangna dakchakaniko on•china mol•molna sika” ine DC aganangaha.
DRDA-ni Project Director, Dolrich BG Momin, “Retail Outlet-ni donganichi SHG-rangna bang•a dakchakani ong•gen. Iachi uamang bosturangko jinmana mesokan baksa parakna gita man•gen. Uni gimin DC Office-ona re•bagipa pilakan ia retail outlet-ona napenba bosturangko bree, SHG-rangna dakchakaniko on•na gita man•gen” ine aganaha.
West Garo Hills a•jani Assistant Deputy Commissioner Rezia Ch Sangma, Shelley Momin, Rojalinda D Shira, Winje Momin, Maryliza K Marak, Extra Assistant Commissioner, District Official-rang, NRLM Department ia tom•anio bakko ra•angaha.