Resubelpara, Dec 6, 2022:North Garo Hills a•jani Kharkutta Block Youth TMC, Sombar salo Kharkutta MDC Cherak W.Momin-ni kosako ong•gija vedio-o tarie Social Media Facebook-rango watpiprae gipatanina jegale, Kharkutta Pulis Station-o badi ka•aha.
Kharkutta Block Youth TMC, President-ni janapatani gitade, ma•sina man•gijagipa Social Media jakkalgipa, jean an•tangtangko Waltingo D.Shira aro Hudu Hada ine mingachim, uamangni facebook-o seatgipa katta, “Baljek Airport Me•gong Festival An•sengakonde, TMC MDC-rang mongsonggipa sokgipa ong•ahakon” ine December 3 tariko seataha.
Kharkutta block youth TMC dolni talatani gitade, re•anggipa GHADC election-o Cherak W.Momin MDC cheani gimin noktangni manderang baksa kusi ong•e chroke roaniko vedio-ko ong•gija taridape social mediarango gipataha, uano darangba gipin dongjachim, demechiksan dongaiachim, ine janapataha.
Unbaksana, Waltingo aro Hudu Hada sakgni ong•gija dake vedio-ko taridapenba, facebook-o seatgipa kattara, “TMC MDC Cherak concert ong•ata dake nomil gipake chocho rim•e chroka vedio viral ong•jok.All India gimik TMC down”.
“Social Media jakkalgipa Waltingo D.Shira aro Hudu Hada sakgni chingni namgipa dilgipako galonne kratcha•atna jotton ka•e social mediarango ong•gija gipataha” ine Kharkutta Block Youth TMC-ni President janapataha.
Je vedio-kon social mediarango giproroatahachim, doltangni nokdangonin ong•achim. “Uamangara ripengskarang aro kam ka•giparang, chingni dilgipani noko donggiparangan ong•na nanga, ua vedio-ra chingni dilgipa uni demechik baksasa kusi ong•achim, gipinde darangba dongja” ineba janapataha.
Cherak Momin namgipa dilgipa ong•ani giminsa, uko ong•siatna aro namgija bimingko man•atna jotton ka•anisan ong•aia ineba talatdapaha.
Uni gimin, ia a•selni bidingo ning•tue sandianiko dakenba dos dakgipa Waltingo D.Shira aro Hudu Hada sakgnini kosako niam gita sastiko on•china TMC chadambe dol dabiangaha.