Tura,May 12,2022: West Garo Hills a•jani Deputy Commissioner, Ram Singh a•jao matchu badinggiparangko sing•sandie uamangni kosako ja•ku de•china West Garo Hills a•jani SP-ko didiataha.
Batanggipa April 4 tariko Garo Hills Youth Organisation (GHYO)-ni President, Nazmul Hashan a•kawe jolo matchu badingani bidingo agan janape West Garo Hills a•jani DC-na lekka sedoataha.
Uni sedoatanina DC April 20 tariko WGH a•jani SP-ko ia obostani bidingo sing•sandianiko dakchina ge•etataha.
“A•jao niam gri matchu badinganirangko bang•en nikna gita man•enga. Uamang niamni kosako Assam a•dokni matchurangko Tikrikkila songona ra•napbae Tikrikkila-oni Halildayganj songona ra•ange bading chiwalenga. Uamang matchurangko badingna dingtangmancha tarigipa gate jean Tikrikkila, Nidanpur, Chibinang, Phulbari, Koylaghat, Gudibala, Rajpur, New Bhaitbari, Hallidayganj aro bang•a songrango donggipa gaterang gita ra•napbae bading chiwalaniko dakenga. Iani bidingo namedake sing•sandina nanga aro niam gri bading chiwalaniko dontongatna nanga ” ine Nazmul Hashan-ni seatgipa lekkao janapataha.