Tura, May 12, 2022: GSU-CEC-ni Additional General Secretary Salman D. Sangma, All Meghalaya Adhoc Skul Teacher (AMAST)-rangni dormahako somoi gita on•china dabianio chu•gimik chakpaaniko on•ate, skigiparangni dabianiko knachakchina a•dokni Skotong Minister Conrad Sangma-na lekka sedoataha.
GSU CEC-ni seatgipa chittio janapatani gitade, Adhoc Skulo skigiparangna jaanti dormaharangko on•china aro uamangni dabiani gita dormaharangko baridapatna nanga. A•dok sorkari bidako mikkango skanggipa donne kamko ka•genchim, ong•ode, skulo skigiparangni dormahako on•na ja•manchakna nangja ine janapataha.
Uni gimin Adhoc Skulo skigiparangni dabianirangko Skotong Minister knachakna nangchongmota aro uamangna sorkario kam ka•enggiparang gitan apsan jaanti dormaharangko on•na nangchongmota ine GSU dabiangaha.
GSU CEC, Tura All Meghalaya Adhoc Skul Teacher-rangni dabianina chakpae Skotong Minister-na lekka sedoatengon a•dok sorkari chu•sokatja ong•ode, GSU rakbata ja•kurangko de•angskagen ine Salman D.Sangma parakataha.