Tura, May 12, 2022: Ja•manchake kobor man•soani gitade, re•anggipa May 7 tarik Sonibar salo Nongalbibra bajaroni re•bapilenggipa me•chikma saksako me•asa saksa so•ote uni manggisiko ma•sina kenne chiringo donuaha ine koborko man•aha.
Indiba ua me•chikmani manggisiko nokni manderang sandie man•pilaha aro dos dakgipa mandeko pulis rim•aha ine kobor u•iataha.
Duko ga•ake sianggipa Purnima Hajong-ko uni depante Muni Das,i me•asa saksa Samson A.Sangma baksa Nongalbibra bajaroni re•bapilengako Pahar Bahanga songo bon•kame nikaha.
Jensalo ua me•chikma nokona sokbapiljahani gimin nokni manderang jajrenge sandina a•bachengaha, indiba uni manggisiko salgnina kingking sandioba man•jaha. Indake Sombar salo uamang buringoniko sandimitting somoio ua me•chimani sendalko man•aha aro an•chi ga•akako Rongmitu Chiringona kingking joljol nikaha, indake uamang uni manggisi chiringo ong•na nanga ine ma•siaha.
Indake uamang gimagipa me•chikmani manggisiko sandie chiringoniko man•aha. Indake manggisiko nikani bakan uamang Nangalbibra pulisna kobor on•ataha aro dos dakgipa Agal bajarni Samson A Sangma-ko pulis rim•aha, maina sianggipa me•chikmako ua mande baksa bon•kame nikachim aro ua me•asaan Purnima Hajong-ko so•ote chiringo galaha ine chu•gimik sakkiko man•aha ineba u•iataha.