Tura, March 24, 2022:West Garo Hills a•jao “World TB Day” ko a•gilsak gimikchin manianga gitan Bristibar salo West Garo Hills a•jani Darenggre Public Health Centre-ni gita Don Bosco Alum Secondary Skul-o maniangaha. Ia tom•bimonganiko West Garo Hills a•jani National Tuberculosis Elimination Programme (NTEP) “Invest to End TB Save Lives” ko katta bichong donne ong•atangaha.
Ia tom•bimonganiona Tura Sacred Heart Parish-ni Rev Father Joy Thomas mongsonggipa sokgipa ong•e bakko ra•angaha. Ua Hospital rangchi re•ange sagipa ding•gipa manderangko grongaha. Ua hospital-o kam ka•enggipa pilak ka•giparangni gisiko nange sagiparangko sanna bannaniko nike mittelpilani kattarangko aganangaha.
“Naljoke rakkianian sanana bate nambata” ine an•chingna skang bi•samitingonin skigiparang aro ma•a parang aganronga, uni gimin an•ching salantian ja•rikna nanga. An•ching an•tangtangko ma•manti sabisioni naljoke rakkina rongtale rakkina nanga, aro rake ja•jjringna nanga aro be•en bimangko mangrake rakkina ranta ka•jringna nanga ineba jinamana aganamgaha.
West Garo Hills a•jani District Tuberculosis Officer Dr. E A. Sangma,” Ia salko jinmana TB sabisini bidingo awareness on•a nangchong•mota ine ia tom•bimonganiko ong•ataha.
TB sabisiko bon•atna aro namatna an•ching sakantini jako ong•a. Sorkari TB saenggipa mandeko indin sanna bannaniko on•an baksana japrako gong 500-ko on•gen, jedakode saenggipa mande nama cha•anirangko bree cha•mangen. An•ching anti gnina bate gusuode TB centre-ona re•ange test ka•na nanga” ineba ua aganaha.
India a•songni sorkari 2025 bilsio Tuberculosis ba TB sabisiko bon•kimatna niksamsoanirang gnang aro ia niksamsoaniko chu•sokatna uamang raken kamko ka•enga ineba ua agandapaha.
Ia tom•bimonganio Reverend Father Joy Thomas SNC Volunteer-rangko demitele aganangan baksana Certificate-rangkona on•angjolaha. TB sabisioni nampilako man•gipa saksa an•tangni sabisioni nampilani itihas_ko aganangjolaha. Fokdor-rang, nurse-rangni una kasa•e sanna bannanirangko dakahani gimin demitele aganangjolaha.
District Tuberculosis Centre, Tura-ni TB-HV Newtone Sangma ua an•tangni tarigimin gitkoba jinmana ring•mittele on•angaha. Tura Civil Hospital-ni Dr. Todik Sangma, District Malaria Officer Tura-ni Dr. Bichitrani Marak, Darenggre PHC-ni Medical & Health officer Dr. Yesmin Sangma, Daren Agal Songni Don Bosco Alumnni Skulni Headmaster Roger Benny Sangma, West Garo Hills a•jani DPC Nikshat Momin mangba ia tom•bimonganio bakko ra•e jinmana aganprakangaha.
Tuberculosis sabisini bidingo Skul-o poraienggipa chatro chatrirangna Open Quiz-koba ong•atjolangaha.