Tura, May 4, 2022: Phulbari aro Chibinang jolni bang•a NGO-rang nangrime May 1 tarik Robibar salo ong•anggipa obostako jegale WGH a•jani Superentindent of Pulis (SP)-na Monggolbar salo lekka sedoataha.
Koborna u•iatani gitade, May 1 tariko, Chibinang bajaro dos grigipa sakgittam A•chik chadamberangko kragija rorirang chadrape dokaha ine u•iataha.
NGO-rangni jegale lekka sedoatanio janapatani gitade, “Doka man•gipa chadambe saksa salni 1 bajimango Chibinang bajarni dokkan mikkango chadenge roengachim, unon rang•san rorirang mamingkoba sing•gija dokna a•bachengaha. Doka man•gipa sakgittamoni saksade bang•a mata buaniko man•aha, dos dakgipa rorirang A•chik chadamberangni janggiko gimaatna gita jotton ka•achim, indiba rasongbee janggi jokaha. Koborni gitade, Chibinang bajaro gari an•pilmiting somoio A•chik saksa gipin jat saksako nangataha, indiba ua salon uamang melie obostako dal•atgija bon•ataha. Indiba rorirang ia a•selo pangchake skatang chadrape dokgipa manderanga Bothu Sarkar, Rakkip Rahman aro Hoju Bepari-sa kajiako bikotdrae A•chikrangko chadrape saknaataha. Doka man•gipa manderanga Abel B. Sangma, Milling B. Sangma aro Edward B Sangma ong•achim. Uamangko beer bottle, garini wrench, goldik aro uandakgipa bosturangchi an•chi pari nikpile dokaha. Indakgipa kamranga ra•chakna man•gijani ong•a aro jat ska jat meligrikgija kajia golmalko ra•baaniba ong•a. Ia obostani bidingo name sing•sandianiko dake dos dakgipa manderangnj kosako raka ja•kuko de•na nanga aro kraa gita sastiko on•na nanga” ine NGO-rang dabiangaha.