Tura, May 4, 2022: West Garo Hills a•jani Phulbari aro Chibinang jolni nangrimgimin NGO-rang Joint Action Committee (JAC), Monggolbar salo tom•bimonganiko ong•ate dos dakgipa manderangko rim•china dabiangaha.
JAC-ni dakchakgipa padot Augustine A.Sangma-ni u•iatani gitade, “Re•anggipa May 1 tarik Robibar salo dos grigipa A•chik sakgittamko dokgipa manderangni kosako badi ka•ahaoba da•alona kingking dos dakgipa manderangko rim•kuja aro uamangni kosako maming ja•ku de•aniko dakuja. Dos dakgipa manderangko pulisrang ta•raken rim•na nanga, jedakode a•kawe jolo tom•tome dongenggipa bang•a jatrang jekai Garo, Rabha, Hajong, Koch, Mann, Bengali, Bihari aro Muslim, chengonin apsan melie nangrime dongenga. Chinga JAC-ni memborrang Phulbari elekkani MLA SG Estamatur Mominin -ni kamko raken jegala. Uni nokdangni manderang a•kawe jolo gimik jatrang apsan meli nangrime dongenganiko nosto ka•an baksana indakgipa so•sojengjeng kajia golmalko ong•ataha. Mongsongbate dos dakgipa manderanga Bothu Sarkar jean Phulbari MLA-ni gritang ong•achim, Rakkip Rahman aro Hoju Bepari uamang sakgittaman Bholarbita aro Chibinang songo donggipa manderang ong•a. Koborko man•soani gitade, ia sakgittam manderang songni bang•a A•chik ba Tribal jatko kukuri, degal, atte aro uandakgipa mandeko saknaatgipa bosturangko mesoke ba jakkale ka•mikkenatenga. Ia obostani bidingo MLA namen ma•sia, indiba maming ja•kuko de•ja. Indake ong•genchimoba doka man•gipa manderangna kakket bichalko on•chongmotna nanga aro kraa gita dos dakgiparangko sastiko on•na nanga” ine JAC dabiangaha.