NGH a•jani chadamberang Meghalaya Games-o kal•susae medalrangko man•a

Tura, May 5, 2022: North Garo Hills a•jani sakgitam chadamberang chang 4-gipa Mebghalaya Games, 2022-o kal•susae WUSHU-o cheaha ine koborna u•iataha.
Ua sakgittam chadamberang A•chik jatna namgioa rasongko ra•baha. Ia chang 4-gipa Meghalaya Games 2022-o North Garo Hills WUSHU Association-ni sakbonga bak ra•giparangoni sakgitam Gold, Silver aro Bronze medalrangko man•aha. Uamang kg 60 Senior Category-o kal•susae Te Choniku G. Momin Gold Medal, kg 50 Junior Category-o kal•susae Tra Thaichemaya M. Momin Silver Medal aro kg 60 Senior Category-o kal•susae Te Jerash K. Marak Bronze Medal-ko man•skaha.
Uamang team-ni skotong ong•e skidilgipa Davis K. Sangma, gnigipa skie on•gipa
Chigasil K. Sangma ong•achim.
WUSHU, ian Chinese-rangni mingsa kal•susaani ong•a, jean Kungfu Martial Arts baksa apsan ong•achim.
Unbaksana North Garo Hills a•jani Mendi Salpara-o donggipa Pa Sengnap Ch.Momin aro Ma Tanya K.Sangma-ni demechik Tra Cathalya Mikera K. Sangma, chang 4-gipa Meghalaya Games 2022-o bakko ra•e me•chikrangni Taewondu Sub Junior kg 19 Category-o kal•susae Gold Medal-ko man•aha.
Apsan North Garo Hills a•jani Kharkutta-o donggipa Pa Rupert M.Momin aro Ma Twinsilda K.Marak-ni depante Te Haggaio K. Marak, me•asarangni Taewondu Sub Junior kg 32 Category-o kal•susae Bronze Medal-ko man•skaha. Ia chang 4-gipa Meghalaya Games 2022-o kal•susana skie on•timgipa Pa Oglick B. Marak ong•achim.