Tura, April 9, 2022: West Garo Hills a•jani Task force, DC aro SP-ni dilangachi Bristibar salo adita ro•ong bikotgipa biaprangko nieaha.
DC rong•te bikotenggipa songni Nokmarangko grongenba, MMDR Act-ni dongimin niamo pangchake chanchirimaniko dakdilangaha.
Bil gnanggipa authority-oniko maming ge•etani ba hukkum-ko man•gija aro dongimin Act ba niamrangko ja•rikgija skatang a•ningni gamrangko bikotna man•jawa ine DC, uamangna aganaha.
A•jao ro•ongrangko bikotani niamrang donga, ua dongimin niamrangko ja•rike kajinarangko aro gipin gamna nanggnirangko gamesa ro•ongrangko bikotna man•gen ineba DC aganbaaha.
Department-ni Official-rang aro pulisrang niam gri dake ro•ong ba a•ningni bosturangko bikotanio jak donggiparangni kosako ja•ku de•aniko dakenba raka sastiko on•na bil donga ineba agandapaha.Uni gimin songni Nokmarang aro dilgiparang niam gri a•ningni gamrangko bikotna on•na nangja ine didiangaha, indiba manigija bikotodraode uamangni kosako badi ka•china DC agan ku•pattie donbaha.