Tura, April 9, 2022:West Garo Hills a•jani Gambegre C&RD blockni ning•o donggipa Bolori jolo Bija Jilani gadang ba Cluster-ko Commerce & Industries Department-ni State Apiculture Mission-o pangchake tang•doataha.
Ia cluster-ni ning•o song dam 18 aro nokdang ge 285 gnang, ua songrangara An•chenggre, Saka Boldamgre, Somonpara, Badupara, Dopgre, Du•sagre, Chenggapara, Meguagre, Jebalgre, Chigitchakgre , Dikimpara aro gipin songrang Gambegre C&RD Block-ni ning•o gnang. Ia Cluster-o nambatgipa rokkomni bija bitchiko man•a.Uamangna bija jilani, bitchi jetani, packing ka•ani aro uarangko palani gimikkon skie on•manaha. Uni gimin jemangan bija bitchi package ka•giminko palna sikgipa Wholesaler-rang aro Retailer dokkanrang B K Charmingstar-ni ia 093669 93294 numbero aro BK Dinendro groupni ia 08787500822 numbero call ka•atna gita man•gen.Unbaksana jemang bija jilna gisiko sikengachim DCIC, Tura-ni Functional Manager Frederick A Sangma-ni ia 94361 65671/ 98560 91996-ona call ka•ate chu•gimik sing•e ra•na gita man•gen ine u•iataha.