Tura, July 20, 2022: Meghalaya A•dokni Skotong Minister Conrad Sangma, a•doko kror 1000 te•brongni Industry-ko kulina man•genchimode bang•a manderang janggi tanganirango dingtanggenchim ine aganangaha.
Bilsi antian a•doko kror 400 damni te•brongrangko man•ronga. Uarangoniko rokomanti cha•anirangko tarie gipin a•dokrangna palatskana man•genchim.
Indake ua Sombar salo Tura Dakkopgre SMELC buildingo ong•atanggipa Jackfruit Mela-o bakko ra•angaha.
“An•ching Garo Hills-o te•brong pangnan chu•onga gita man•a aro an•ching a•jani te•brongrang namen cha•tobea. An•ching sorkarini gitaba Jackfruit Mission Scheme-rang gnang, manderang ia scheme-o bakko ra•e sorkarini dakchakaniko man•gen, an•tangtangni te•brong biterangko bading chiwalaniko baridapatna aro tang•dodapatna man•gen. Jackfruit Mission-ko 2018 bilsio Directorate of Food and Processing bilsi 5-ni program-na tik ka•aha. Indake ia bilsi bongani gisepo ia Jackfruit Mission Scheme-ni gita bang•a manderangna dakchakaniko on•enga” ineba Conrad Sangma aganangaha.
Ia Jackfruit Mela-ko West Garo Hills a•jani District Horticulture Department aro Directorate of Food Processing apsan nangrime ong•atangaha. Indake ia tom•anio bakko ra•ani ja•mano Conrad Sangma, South West Garo Hills a•jani Rangsakona-o sak 161 ge•e game cha•giparangna lak 92 hajar 60-ni cheque-rangko FOCUS program-ni gita suale on•angjolaha.