Tura, June 6, 2022:West Garo Hills a•jani Deputy Commissioner, Swapnil Tembe Sombar salo Selsella jolrango chi bana re•enggipa biaprangko nieaha.
Re•anggipa Sukrobar waloni salgnina kingking dondikgija mikkarang jimbee waani a•sel chiring chibisikrang dal•bae, West Garo Hills a•jao donggipa a•kawe jolrango chi bana re•na a•bachengaha.
Indaken Selsella jolo donggipa bang•a songrang, dokkanrang aro rama sorokrango chi mriptokaha. Chi mripatako man•ne duko ga•akenggipa manderangko dakchakna aro uamangna naljokaniko on•na tarigimin dongchakani biaprangkoba DC niangjolaha.
Inadake ong•engon, ia kenbegnigipa a•selrangoni naljokna songdongenggipa manderangko chibima aro chiring sambarangoni chel•e dongchina mol•molanga baksana an•tangtangko naljoke rakkina man•na gita simsake dongchina gitaba DC manderangko didiangaha.