Baghmara, June 6, 2022: South Garo Hills a•jani ning•o donggipa bang•a songrango wachini somoio bijolina neng•nikaniko man•engani gimin, MePDCL Department-ni bil gnanggiparangna lekka sedoataha ine u•iataha.
“South Garo Hills a•jani MePDCL Department-o tanggittik kamna rakkigipa sakgittam Linemanrang aro a•palni kamna sak bonga manderangsan dongaia. Iani a•sel bijoli nosto ong•ako tarimiting somoirango songni manderangsa dakchake on•ronga. Linemanrang chu•ongjani a•selo wachi kario bang•a songrang andalmitdik rona nangao ga•aka. Linemanrang komiani a•sel, mikka balwana nosto ong•gipa bijolini sillitting ba budurangko tarina bil amsokchakja. Ia obostani bidingo dilgiparang aro Department-ni Officer-rang niroke, chu•onga gita manderangko kamo rakkina nanga. Jedakode wachini somoio songni manderang bijolina maming neng•nikaniko man•jawa” ine Social Activist, Matsram Marak janapataha.