Shillong, November 5, 2022: Jal Shakti-ni Union Minister (UM), Gajendra Singh Shekhawat, Jal Jeevan Mission (JJM) Scheme-ko kam ka•anio Meghalaya a•dok, gipin a•dokrangna bate nambatgipa ong•aha ine aganangaha.
Shekhawat, Meghalaya a•dokona re•baon, JJM Scheme-ko name kam ka•ani bidingo ua de•mittele aganangaha.
Batanggimin 2019 bilsini August jao, ge 4,550 nokdangrangsan chi pipe-rangko man•engachim, indiba 2022 bilsio a•dokni kona noksik gimiko lak 2 hajar 61 nokdangrang chi pipe-rangko man•tokaha.
Meghalaya a•doko “4.51% percent-ni gita tang•dodapanichi aro National Growth Rate 36% percent-ko badeangenba, Meghalaya a•dok ‘Role Model’ ong•e gipin a•dokrangko re•dilenga. Anga bebe ra•a aro ka•donga, Meghalaya a•dok dongimin somoina skangan a•dok gimikni nokdang ge•antina JJM Scheme-ko matchote on•gen. India a•songo Meghalaya a•dok mangmangsan bilsi 2-ni gisepo JJM Scheme-ko bang•a nokrangna sokate on•na man•ani gimin, ‘Performance Incentive Grant’-ko man•chenggipa ong•a. India a•song gimiko, Meghalaya a•dok mangmangsan Water Policy donggipa ong•a, uni gimin, Watershed Management-na gong kror 700 tangkarangko a•dokna on•gen aro dam 2500 pokkrirangko tarigen” ine Shekhawat aganangaha.
Unbaksana, ua a•dok sorkarini nama kamrangko nikangenba katchae de•mittelangaha. Meghalaya a•dokan gipin a•dokrangna nama re•dilaniko dakmesokaha ineba ua agandapangaha.
Skotong Minister Conrad Sangma jinmana aganprakengon, “Anga Jal Shakti-ni Union Minister, Gajendra Singh Shekhawat-ko uni dakchakanina dingtangmancha mittelpilna sika. Uamangni dakchakanichi a•doko JJM Scheme-ko tarina gita man•aha. Uni de•mittele agananggipa kattarangko chinga gisiko donne, mikkangchiba nama kamrangko ka•anggen” ine Pa Sangma aganangskaha.
Batanggimin salrango India a•songni President Droupadi Murmu a•song gimiko JJM Scheme-ko nambate kam ka•anina Meghalaya a•dokna “Best JJM Implementation Award” ba Upati-ko on•aha ineba agandapangaha.