Tura, November 5, 2022: All Garo Hills PMGSY Union, November 3 tariko tom•aniko ong•ate jinma chanchirimaniko dakangaha.
“Ia tom•anio chinga kamrangko matchotatna sorkarini on•gimin somoi gita bill-rangko gamkujani bidingo, National Quality Monitor (NQM) aro State Quality Monitor (SQM)-ni re•bae nirok sandiani aro mikkangchi dakna nanggni kamrangni gimin chanchirimaniko dakangaha. Re•anggipa September 30 tarikoni World Bank fund-rangko dontongate man•jaenga ba lapsed ong•enga, jeni a•sel contractor-rang uamangni ka•enggipa kamrangko matchotatna neng•enga. Indake kamrangko ka•angna gita gipinoni sokbagipa fund-rang dongjani gimin, uamangni tarie on•gimin bill-rangko man•na ka•dongjaenga. Uni gimin ia pilak obostarang namani ja•manosa kamrangko a•bachengattaina man•gnok. Uni gisepon, kamrangko dontonganiara contractor-rangna sin•jetaniko ra•baenga” ine Publicity Secretary Rikchi A Sangma parakataha.
Uasan ong•aigija NQM aro SQM-rangni kam ka•anirangko re•bae nirokrokani aro on•gimin somoi gita kamrangko matchotatna ge•etaniara Contractor-rangna dal•a sinjetanirangko on•enga ineba ua janapataha.