Juri Maharini Rong•gru a•briko Nokma palsrukani gimin kajia ong•ani batroroenga

Resubelpara, Nov 5, 2022: North Garo Hills A•jani Bajengdoba sepango donggipa Dajong Warigre Ssongni Rong•gru A•briko Dajongpara songni Nokma Sky B Marak tangka gong lak 95,000-na Tura Danakgre-ni Joban Sangma-na palsrukani gimin kajia golmal ong•ani batroroenga ine koborna u•iataha.

Koborna u•atani gitade, Juri Maharini A•kingo donggipa Rong•gru A•briko songni manderang baksa maming chanchirimgija Nokma saksan palsrukaha. Ia Rong•gru A•brini ku•choto dal•gipa Rong•brak dongachim.

Indake ong•engon, Dajongpara songni Nokma Rong•gru A•briko ro•ong bikotna palsrukani gimin Juri Mahari aro Chrarang ma•sie ua a•brioniko ro•ong bikotaniko champengna gita guari ba bera kadulako pe•gale ro•ong bikotengani gimin Sukrobar salo tom•e chanchirimaniko dakangaha.

Guari kapenge donako Dajongpara songni Nokma aro uni manderang pe•galenba, Nokma ua A•brioniko ro•ong bikotna rikenggipa nokrangko re•anggipa October 31 tariko Juri Maharirang pe•gale galskaha aro paikanarangko wa•al so•e galaha ineba kobor man•aha.

Uni gisepon, Joban Sangma ua a•briko breenba ro•ong bikotna garirangko ra•ange donenggipako da•onaba ra•angpilkujani gimin Juri Maharirang una sal 15 somoiko on•ataha. Uni gisepon ua garirangko Rong•gru A•brioniko ra•angpilja ong•ode, garirangko nosto ka•e galgen ineba Juri Maharirang parakataha.