Shillong, Dec 17, 2022:Mikkangchi songsalko nambatatna miksonganio Umroi-ni TMC MLA George B Lyngdoh Sonibar salo Ri-Bhoi a•jani Umsning Sub-Diviaion-ni ning•o donggipa Umktieh Community Hall-ko noksonggae ba do•ga oprake on•angaha.
Ia project-na Chief Minister’s Special Development Fund-ni ning•o pangchake tangka gong lak 2,50,000-ko bilsi 2021-2022-na chamataha.
Sin•karini somoio namen sin•ani gimin, MLA Umktieh songni manderangna ba•ra chinani shawl-rangko suale on•angaha. Indake ia tom•anio Meghalaya TMC Umroi Block-ni Vice President CL Masharing dongpae bakko ra•angaha.
MLA jinmana aganprakengon, “Chinga songni manderangna namgipa cholko on•na gita Umktieh songni Community Hall-ko nokdonggae on•aha, jedakode manderang da•o aro mikkangchi nanga kamrangna jakkalangchina. Unbaksana Umktieh Sub-Center-ba chu•sokgipa ong•aha. Anga ka•donga mikkang bilsio gital PHC-ko Umiam-o man•gen” ine aganangaha.