Man•na nanggipa dormaharangko Krismas boksis dake on•na nanga: Bernard

0

Tura, December 17, 2022: Bharatiya Janata Party (BJP)-ni Spokesperson Bernard N.Marak, bang•a Department-rango kam ka•giparangni ru•uta jarangna man•gijagipa dormaharangko Krismas-na boksis on•china Skotong Minister Conrad Sangma-ko didiataha.

Bernard Marak-ni janapatani gitade, Skotong Minister Conrad Sangma Krismas boksis dake man•kugijagipa dormaharangko on•na nanga. GHADC-o kam ka•enggiparang, SSA skulni skigiparang, Adhoc aro Contractual-o kam ka•giparang, Covid Staff-rang aro bang•a Contractor-rangni man•gija dongenggipa tangka paisarang aro dormaharangko Krismas-na skang on•na nanga ineba Bernard Marak janapataha.

“Conrad Sangma manderangna ka•sagenchimode, Krismas-na skang bang•a Department-rango kam ka•giparangni man•kugijagipa dormaharangko on•na nangchongmota. Bang•a nokdangni manderang dormaharangko man•kujani a•sel duk mikchi ong•e Krismas-ko nichaksona nangenga. A•dokni Finance Department, Skotong Minister-ni ning•osa ga•aka. Ua (Conrad) Finance Department-ko pilak Department-rangni dormaharangko on•china ge•etna bil donga. Ma•mong sorkarini sokatna nangenggipa tangkarangko sokataha. Indiba ma•mong sorkari mitam Department-rangni tangkarangko sokatna man•kujaode, mandesan ong•e, apsan melie kamrangko ka•angna man•gen. Chinga Krismas-ni somoio pilak nokdangni manderangna kusiniko aro katchaaniko gapatna kamko ka•na miksonga” ine Bernard Marak janapataha.

PMAY, PM Kishan, IHHL, Job Card Holder, Old Age Pension, Disable ong•gipa manderang aro bang•a manderangni man•na nanggnirangko man•kujaenga. Kusini sal somoio manderangni kusiniko cha•sotaniara Politics aro Politician-rangna kraani ong•ja ineba janapataha.

“Sabka Saath, Sabka Vikas, Sabka Vishwas, Sabka Prayas, jean BJP dolni dakna mangsonggipa kam ong•a. Uarangko mikkango donne, chinga kangal cholgrirangko kal•steke roaniko jrip nie donjawa. Skotong Minister-ko BJL dolsa songaha aro BJP-ni dakchakanikosa man•enga. Uni gimin BJP dolni nangnika gita manderangni man•na nanggni tangkarangko darangkoba galchanggija gimiknan apsan Krismas-na skang on•na nanga” ineba Bernard Marak didiangaha.

Leave A Reply

Your email address will not be published.