UDP re•baenggipa eleksino ge 30-na bate seatrangko man•gen: Metbah Lyngdoh

 Shillong, September 11, 2022: United Democratic Party (UDP)-ni President Metbah Lyngdoh, re•baenggipa 2023 bilsini eleksino bang•bata seatrangko man•na ka•donganiko parakataha.

“Batanggipa 1988 bilsio UDP ge 20 seat-rangko man•ne sorkariko rikaha. Indake re•baenggipa 2023 bilsioba UDP rakbee kamrangko ka•an baksana manderangni neng•nikanirangko knachake ge 30-na bate seatrangko man•gen” ine Laitumkrah Bomfyle Road-o UDP Party Office-ko nokdonggaani bilsi 25-gipa Foundation Day-ko maniani salo Metbah Lyngdoh aganangaha.

“Manderang boda ong•ja, indiba uamangni sontol ong•aniko bang•a manderang an•tangtangni namgnina jakkalsreta. Chinga UDP dol tangka paisachi ong•ja, indiba manderangni nangnikanirangko knachake uamangna kamrangko ka•anggen” ineba ua agandapangaha.

UDP dilgipa aro MDC ong•enggipa Paul Lyngdoh, gital Meghalaya-ko rikna kamrangko ka•na a•bachengaha aro UDP dolni MP candidate-ko Parliament-ona watatna chinga rakbee kamrangko ka•anggen ineba parakataha.

UDP dolni gitcham dilgipa, Bindo M Lanong, “Corruption-ko an•ching ra•galna nangenga, corruption-chi a•dokko rikna man•jawa” ine aganangskaaha.

Unbaksana, UDP-ni Vice President, Allantry F Dkhar, “Da•al dipet chinga an•tangtangko dolni nisan aro miksonganirangko chu•sokatna on•kange kamrangko ka•anggen. Nisan-o donggipa Gitchak rong on•kangani ka•dongani, gipok- tom•tomani meligrikani, tangsim rong dal•droani chinko mesoka. Uni gimin chinga UDP dol an•tangtangko on•kange, jinma baksa melie a•dokko jatko dal•droatna krengbee kamrangko ka•anggen” ine aganangaha.

UDP dilgipa aro a•dokni Home Minister Lakhmen Rymbui, Working President aro KHADC-ni CEM Tittostarwell Chyne ia manianio dongpae UDP dolni miksongani mikkangchi dakgni kamrangko jinmana aganprakangaha.