Tura, August 24, 2022: Bharatiya Janata Party (BJP) dolni General Secretary Wilver M Danggo, West Garo Hills a•jani Superentindent of Pulis (SP) VS Rathore-ni songbadrango seatgipa kattarangko jegalataha.
SP Vivekananda Singh Rathore-ni janapatani gitade, BJP dolni ka•rimskarang Tura bajaro dokkan dakgiparangoniko tangka gildrae ra•engani a•selo, dokkan dakgiparang bosturangni damko tang•dodapatna nangenga ine parakataha.
Indake SP-ni agangipa kattarangko jegalatengon, BJP Tura-ni General Secretary Wilver Danggo, “SP-ni agangipa kattarang maming ja•dil aro ja•pang dongja, uamang chingni bimingko nosto ong•atna tol•drae kamrangko ka•enga. Chingni uko WGH a•jaoniko a•rikgalchina dabiangahani gimin ua chingko tol•e songbadrango jakbikpilskaenga. Bosturangni damrang antion, japrakon baririkenga, ian Tura songjinmaosan ong•ja, indiba India gimikon baririkenga. Indide India a•song gimiko bosturangni dam barianina Bernard, Wilver, Anish aro Patcheng chinga sak briko dos galode ong•genma? Angni sing•anina WGH a•jani SP aganchakaniko on•na nangchongmotgen. Bosturangni dam barigenchimode uko nirok sandina District Administration-ni jakosa ong•a, Pulisni kam ong•ja” ine jegalataha.
Meghalaya Chamber of Commerce (MCC), ian bading chiwalenggipa manderangni bikotgipa ge•sa dol ong•a. Ia dolo sak 400 manderang gnang, jemangan dingtang dingtang jatrang ong•a. Indide Tura-ni SP-ara mainasa BJP dolni manderangkosan, maina A•chik jatrangkosan biming mingaha. Tura-ni SP-ara indide mikkang nitee kamrangko ka•engama? Chinga BJP dolni ka•rimskarang a•bachengonin Pulis baksa nangrime kamrangko ka•engachim. Indiba ua chingko janggilchini jakbikpilskaaha. Chinga MDC Bernard Marak-ni case-ko da•ona kingkingba Independent inquiry ka•china dabienga aro Tura-ni SP Vivekananda Singh Rathore-ko kam ra•jitangchina dabienga ineba ua agandapataha.