Tura, Aug 25, 2022: NGO-rangni salgittamna MeECL Office-ko Picketing ka•engon, Garo Hills-ni dingtang singtang biaprang jekai Tura, Williamnagar, Mendipathar aro Selsella MeECL office-rangko gnigipa salna picketing ka•ani tom•tome matchotanga, indiba sorkari side-oni maming aganchakaniko man•kuja ine GSU dilgiparang u•iataha.
Indake gnigipa salni MeECL office-ko picketing ka•engon, Mendipathar MeECL department kangal cholgrirangna, skatang Bill-rangko tarie on•enga ine adita salna skang jolni saksa parakataha.
Uni parakatani gitade, noko light-bulb rong 3 ba rong 5 dake jakkaloba bill bang•e sokaia, indiba nokko washing machine, rice cooker, grainnder machine aro pumping machine-rangko jakkalgiparang bill komie sokskaenga, iara maini a•sel indake ong•enga ineba sing•doangaha.
Indake MeECL office-ko picketing ka•ani somoio kobor ra•timgiparangna GSU Northern Zone-ni General Secretary Walseng Sangma-ni agana gitade, Mendipathar MeECL department-ni kosako skatang billrangko tariengani bidingo sing•sandianiko dakanggen ine parakataha.