Tura, August 24, 2022: Re•anggipa jarango bang•a manderang Tura bajaro me•su samjakrang, cha•anirang, do•chi, be•en aro rokomanti bosturangni dam bariani gimin badi ka•aha aro ia obostani bidingo bang•a songbad rango chappa ka•ahachim.
Ia obostako West Garo pulisrang, Headquarter-oni ge•etaniko man•ne, jinmana u•iatgija sing•sandianiko dakaha.
Sing•sandianiko dakahaon Pulisrang, me•su samjak, cha•ani ring•ani, do•chi, be•en, aro rokomanti bosturangni dam bariani a•sel bang•a manderang neng•nikaniko man•enga ine koborna parakataha.
“Meghalaya Chamber of Commerce (MCC) jekon Bernard, Wilver, Anish, aro Patcheng chalaiengachim uamangni ge•etaniko man•ne, dokkan dakenggiparang bostuni damrangko bariataha. Uamang dokkan dakenggipa manderangchiko japrako membership fee aro monthly renewal fee tangkarangko gildraenga. Uasan ong•aigija, MCC badingenggipa gipin jatrang Bernard Marak-ni “Non-Objection Certificate”-ko ra•echina ka•mikkenataha. Bernard Marak-niko NOC ra•jagenchimode, uamang “Trading by Non-Tribal” (TNT) License-ko renew ka•na man•jawa ine ka•mikkenataha. Gipin jatrangna NOC-ko on•anichi uamang an•tangtangna bang•a tangkarangko ra•rikaha. Sweets and Confectionaries Association of Tura manderangni neng•nikaniko nike cha•anirangni damko komiatna tik ka•angaha. Dam Komiatako man•gipa cha•anirangko August jani 22 tarikoni ra•gatangaha” ine SP Vivekanand Singh Rathore u•iataha.
“Chinga Pulisrang Sweets and Confectionaries Association of Tura dolni ka•donge jinmani namgnina damrangko komiatanina mittelpilna sika. Chinga re•baenggipa salrango gipin dokkan dakenggiparang baksaba bosturangni damko tang•onatpilna agan-golpogrikanggen.
Bosturangni damko bariatanio jak donggipa manderangni kosako Tura PS Case No. 189 (08) 2022 u/s 120B/384/417/419/420/467/468/471 IPC-o pangchake mamlako segataha” ineba SP parakataha.