Tura, Aug 24, 2022:Garo Hills-ni dolbri NGO-rang ADE, AYWO, FKJGP aro FAF, Khasi Hills-ni NGO-rang KSU, FKJGP, JACBOM aro gipinrang, Sima Ario donge neng•nikaniko man•enggipa songni manderang aro a•dok chigako nirokgipa Nokma Sordar-rang jinma apsan ku•monge, soi ka•gimin MoU-ko jegale namnikgijaniko mesokna re•anggipa August 22 tarik Sombar salo Shillong Civil Hospital sambao donggipa U-Kiang Nangbah-ni bimangko tarie dongipa biapo asonge jingjengatangaha.
Indake jingjengata matchotani ja•mano NGO dilgiparang Monggolbar salo a•dokni Skotong Minister, Conrad Sangma-ko Shillong-o gronge, soi ka•gimin MoU-ko nipiltaichina mol•molanga baksana uamangni segimin memorandum-ko on•angjolaha.
NGO-rangni dabia gita Skotong Minister Conrad Sangma, uamangni soi ka•gimin MoU-ko nipiltaigen ine ku•rachakataha.
Indake ong•engon, Skotong Minister-ni ku•rachakgipa kattarang baditana kingking kakket ong•a, uni ku•rachaka gita kam ka•ama, ka•ja antigittamna senggen. Uni gisepon kam ka•ja ong•ode, rakbate jingjengataniko dakangtaigen ine NGO-rang parakatskaha.