Tura, April 21, 2023: West Garo Hills, District Commerce amd Industries Centre (DCIC)-ni Tura Parade Ground-o salgnina ong·atenggipa Tura Industrial Fair (TIF) 2.0-ko Bristibar salo, West Garo Hills a·jani Deputy Commissioner Jagdish Chelani, oprake on·angaha.
Bilsianti ong·atrongenggipa, Industrial Fair-ko ia bilsioba District Commerce & Industries Centre ong·atenga. Ia industrial fair-ko, a•jao bading chiwalenggipa manderangko tang•doatna aro uamangni bosturangko palna sim·na gita bilsianti ong·atrongenga.
Indake ia Industrial Fair-ko a·bachengatanio, West Garo Hills a·jani Deputy Commissioner Jagdish Chelani,mongsonggipa sokgipa ong•e, jinmana aganprakengon, ia industrial fair-o bak ra·enggipa manderangna an·tangni bakrimpaaniko on·angenba, uamangni bosturangna aro kamrangna mittelpilani kattako aganangaha.
District Commerce & Industries Centre-ni kamrangko parakangengon, jakni kamrangko ka·e cha·enggipa manderangko chubata gadangona ra·dona man·gen, ine DC an·tangni ka·dongchakaniko parakangaha.
Uandake ia industrial fair-ko a·bachengatanio DCIC-ni Joint Director P Toi, jinmana aganprakengon, ia exhibition-ko DCIC, bilsiantian ong·atenga aro ia exhibition-ko re·anggipa bilsi dipet Tura Industrial Fair ine biming donaha ine aganangskaha.
Ia exhibition-o bak ra·giparangoniko State Handicraft Award-na seokgen aro seoka man·gipa manderang, New Delhi-ni IIFT aro dingtang dingtang a·dokrango ong·atenggipa exhibition-rango bakko ra·angna cholko man·gen ineba Toi aganangaha.
Uandake Tura Industrial Fair-ko ong·atanio bang•a dingtang dingtang department-rang, jekai Animal Husbandry & Veterinary, Sericulture & Weaving, Horticulture, Tura Polytechnic (Food Processing) aro department-rangko man·chape, Garo Hills-o jakchi tarigipa bosturangko badingenggipa manderangba bakko ra·e, ma·manti bosturangko mesokna aro palna gita re•batokaha.
Indake ia Tura Industrial Fair-ko April 20-oni 21 tarikona ong•atenga, uni gimin gisiko nanggipa manderang Tura Parade Ground-ona re·ange, bosturangko nina aro brena man·gen ineba u•iataha.