Tura, April 21, 2023: Garo Hills-o salo changgni aro walo changgni konta 7-oni konta 10-ona bijoli kimitengani gimin manderang neng·nikaniko man•tokengani gimin bijoli kimitaniko konta 2-oni konta 4-ona komiatchina Federation of Khasi Jaintia and Garo People (FKJGP) Garo Hills Zone, a·dokni Power Minister AT Mondal-na lekka sedoate mol·molataha.
FKJGP Garo Hills Zone-ni President Pritam Arengh-ni parakata gitade, da•roro Garo Hills-o nangana batpile ding·aniko chakna nangengon, bijoliko konta 7-oni konta 10-ona kimitengani a•sel manderangna dongtogijaniko on·enga aro manderangni janggi tanganio nangchakeaniko ra·baenga ine janapataha.
A·songni bang•a dingtang dingtang power agency-rangna grorang dongani a•sel Meghalaya sorkari tangka paisana neng·nikaniko chagrongenga. Indake ong•genchimoba a•doko songdongenggipa manderangoniko State GST-ko ra·skaengani gimin Meghalaya a·dokni obosta skangna bate da·o nambatenga ine ma•sina man•a. A·dokni manderang da·o ma·mong sorkarina Central GST-ko gaman baksana a·dok sorkarinaba State GST-ko gamengani gimin bijoliko nanga gita man•na ka•dongachim, indiba batesa bijolina neng•nikaniko man•batskaenga ine Pritam Arengh patakataha.
Indake ong·engon, a·doko bijoli kimitaniko nipiltaie, man·a dipet bijoli kimitaniko konta 2-oni konta 4-ona komiatchina gita FKJGP Garo Hills Zone, a·dok sorkariko didiataha.