Tura, April 29, 2022: Tura-ni MP Agatha Sangma Bristibar salo Rongram C&RD Block-ni ning•o donggipa Duragre songni Digri Chiring Fish Seed Farm-o Fisheries Department-ni Training Hall-ko oprake on•angaha.Unbaksana ua seokako man•gipa na•tok jilgiparangna Pradhan Mantri Matsya Sampada Yojna 2021-22-ni gita chakka ge•gittam donggipa garirangko suale on•angjolaha.Ia tom•anio WGH a•jani Deputy Commissioner Ram Singh aro GH a•jani pilak Fisheries Department-ni Officer-rangba bakko ra•angaha ine u•iataha.
Training Hall-ko Oprake on•engon, Agatha Sangma ia training hall donganichi a•jani pilak na•tok jilgipa manderang namgniko man•gnok aro jillatangko bang•dapatna aro pale sim•e an•tangna bang•a namdapanirangko man•gnok. PMMSY Scheme-ni dakna nanggni kamrangko aro miksonganirangko chu•sokatna a•dok sorkari aro Skotong Minister raken kamko ka•enga. An•ching gipin a•dokrangoniko na•tok ra•napaniko komiatna, a•doktangon na•tokrangko chu•onge jilna nanga. Je manderangan chakka ge•gittamgipa gariko aro ice box-rangko man•ahachim, uamang rake kamko ka•e jillatangko a•dok gimikchin sokatna jotton ka•na nanga ine aganangaha.
WGH a•jani Deputy Commissioner Ram Singh, an•ching a•doko na•tok cha•giparang bang•genchimoba, a•doko na•tok jilgiparang komia. Iani a•selo an•ching Andra Pradesh aro Orissa a•dokrangonikosa na•tokrangko ra•bana nangenga. An•ching na•tokrangko jillan baksana samtangtango donggipa buring bolgrimrangko ripingjolna nanga ineba aganangaha.
Ia tom•bimonganio Fisheries Department-ni Assistant Director, Roger Benny R Marak rimchaksoani kattarangko aganangaha aro WGH a•jani Suprentindent of Fisheries bon•kame mitelpilani kattarangko aganangaha.