Tura, April 29, 2022: Garo Students Union (GSU) Western Zone (North) Dadenggre-ni President Tengsan M Marak, Dadenggre jolrango adita jarangna kingking bijoli tik ong•jani bidingo MePDCL Department-o sing•doangaha.
“Dadenggre jolo adita jarangna bijoli tik ong•gijaniko nikna gita man•a. Iani a•sel office-o kam ka•giparang, dokkan dakenggipa manderang, noktangtangona motor pump-ko jakkale chi saldoenggiparang bang•a neng•nikanirangko man•aha. Da•ororoni chasongo an•ching bijoliko salanti janggi tanganio nanga. Dadenggre-o bijoli tik ong•jani bidingo janapa changantian Dadenggre MePDCL Department-ni SDO pangnan Rongkhon Power Station-ko pa•sikronga. Indiba bang•a changon Rongkhon Power Stationzni dos ong•ja. Dadenggre MePDCL Department-o bijoli nosto ong•ako tarina changgipa sapgipa manderang bang•en gnang. Uamang FeDCO-o kam ka•enggiparang baksa ground zero-oni bijoli nosto ong•ako nirok sandie tarina nanga. FeDCO-o kam ka•giparang maming industrial training gri kamrangko ka•enga, indiba MePDCL Department-ni manderang pilakan training ra•gimin manderang ong•a. Indide uamang FeDCO baksa maina bakrime kamrangko ka•jaenga? Bijolini bidingo koborrangko ra•na ine Power Department-ni manderangna phone ka•atgenchimoba uamang phone-rangko ra•chakja. Dadenggre-ni wilwilao donggipa bang•a bijoli pose-rang nosto ong•aha aro ia obostani bidingo MePDCL Department-ni manderangba u•itoka, indiba uamang nosto ong•ako nikeba tarija” ine Tengsan Marak janapataha.