Tura, March 31, 2022: Tura-ni BJP MDC Bernard N.Marak Budbar salo Rural Local Bodies (RLB) ba Village Council (VC)-ko ra•bataina motion-ko ra•bae budget session-o chanchirimangaha.Ia RLB-ko ra•baani miksongara songadam nokadamrangko namroro silroroatna songni Nokma sordar-rangko aro songni nokni manderangko bil gnangatna ia VC-ko ra•bapilani ong•achim.Budget Session-ni bon•kamgipa Budbar salo Tura-ni MDC Bernard N.Marak VC-ko ra•bataiani gimin chanchirimaniko ra•baaha.
“Meghalaya a•dokko man•chengaonin VC-ni tangkarangko man•jaha, maina political dolni sinjetanirangko man•ne, Rural Development Fund-ko a•dokonasa watatenga. Indake a•dok sorkari ia tangkarangko District Rural Development Agency (DRDA)-ni gita ra•gate songrango Village Employment Council (VEC)-ko chalaienga, uko GHADC-sa jako ra•e kam ka•na nangachim. Re•anggipa 2014 bilsio ma•mong aro a•dok sorkari ANVC baksa soi ka•grikgimin, Agreed Text for Settlement-o pangchake seoka man•gipa Rural Local Bodies (Traditional Bodies ba Institutions), ma•mongni village council-na tangka watatako nangnikenga ine Bernard Marak aganaha.
Songo noko ia niamrangko ra•gatanichi bang•a namgnirangko man•gen aro Nokmarang village level-ni gita namroro silroroaniko tang•doatna village council-ko ra•gataniara namgipa chol ong•gen. Songni Nokmarang village council-o dilgipa ong•e gitcham officio membor-rang ong•anggen.
Ia VC-an manderangni gadangko bilakatgen aro biltango pangchakna gita man•gen ineba Marak agandapangaha. Tura MDC-ni Budbar salo chanchirimna ra•bagipa mingbonga motion-rangoniko mingsa motion-ko house-o ra•chakaninaba ua mittelangaha.
Unbaksana, GHADC-ni Deputy CEM Nikman Ch.Marak-ni ra•bagipa GCL motion-ko House-o jinma namnike ra•chakangaha aro ka•sine nipiltaianiko dakna committee ge•sako songe, songni Nokma Sordarrang senior citizen-rang, songni manderang aro ma•giparang baksa apsan chanchirimaniko dakgen ine house-o MDC-rang tik ka•angaha.
Indake salgnina ong•atanggipa GHADC-ni budget session-ko Monggolbar salo a•bachengate, Budbar salo sason ka•enggipa aro warachakenggipa dolni MDC-rang apsan nangrime dingtang dingtang motion-rangko ra•bae chanchirimaniko dakenba House-o ra•chakanagaha.