Ronjit Sangma-ni songbad-o seatanina Gondenggre Nokmani su•gipa aganchakatskaa
Tura, March 31, 2022: Gondenggre songo ong•enggipa obostani bidingo Budbar salo Rongjit T.Sangma-ni songbad-rango seatgipa kattarangna Gondenggre Nokma-ni su•gipa Ma Rettina Ch. Marak aganchakatskaha.
Ma Rettina Marak-ni aganchakatani gitade, Gondenggre songara skang British-ni simoion Gondeng Te•gite Sangma-ni Nokma ong•mittingon, Gondenggre songko Britist-rang Map Wa•reng sale sima ariko tarie donangaha aro Gondenggre A•kingni map-wa•reng da•onaba Gondeng sagini nokbikromo dongkuenga. Unbaksana Britist-rang Gondenggre Nokmana silai manggot ge•sako boksis donangaha, uaba da•alonan dongkuenga, uarangan Gondenggre songni sakkirang ong•a.Indake Gondeng Sangma-ni sia ja•mano uni jik dedrang, ama ambirang aro de-su•drang Nokma ong•barikrikenga.
“Atchu Gondeng Te•gite Sangma an•tangni bimingchin Gondenggre songko biming donaha. Atchu Gondeng saksa Gondenggre songo dongdilchenge a•briko bolma wa•ma pe•e wang•e, a•ba o•e, game ge•e, bagan bari dake songdong a•chadilchenggipa ong•a” ine Nokmani su•gipa agan talatskaha.
“Uni gisepon Gondenggre songni a•arangko ra•sekna jotton ka•ani gimin changni chang katchari-o, village court-o aro district council court-o dakgrikaha, indiba Ronjit Sangma-ni dolrang skangonin a•ana dakgrikao changsaba ama dongkuja aro raiko man•kuja. Indiba Gondeng Sangma-ni de-su•drangnasa 1979 bisini August 8 tariko atchu Jogen Sangma-na katchari raiko on•aha. Uni gimin Ronjit Sangma-ni nokbikromo, Gondeng Sangma-ni nokbikromni map wa•reng aro lekkarang dongja aro sandioba ua lekkarangko uamangoniko man•jawa. Indake Gondeng-ni nokdangni deritchu su•ritchurang chasong 16-na tom•tome Nokma ong•baengachim, ndiba jensalo Ronjit Sangma aro Michael Marak, Gondenggre A•kingni ning•o donggipa a•arang jekai Jong•dol, Walgro, Ringgi Bisik, Dram, Mendari A•ding aro Dambongga-ko mikboke ra•sekna jotton ka•enba kajia golmal dake a•ana dakgrikengon, re•anggipa 2019 bilsio Brilliant R.Sangma jean GHADC-o Land & Revenue-ni EM in-charge ong•mittingo Gondenggre-ni Nokma Jimbirth Sangma-ni dolko okamgija, Ronjit Sangma-ni dlko srik srik okamate, Ronjit Sangma-ni jikgipa Ma Benji Marak-ko Nokma gate donangaha. Uani bidingo da•onaba katchario case ong•enga aro da•o re•baenggipa April 19 tariko katcharini hearing donga” ine Ma Rettina Marak parakataha.
Unbaksana Gondenggre songo a•ana kajia ka•e, Ronjit Sangma, Michael Marak aro uamangni dol re•anggipa 2021 bilsini July 27 tarik waljatchio Jimbirth Sangma aro Kenedy Marak-ni dolni nokdang ge 9-ni gue bagan dakgimin aro gue bite nanggiminrangko bipang 2000-na bate den•ne galaha. Uni gimin Kenedy Marak, Jengjal Pulis Station-o badi ka•ahachim, indiba Jengjal PS-ni officer in-charge, Ronjit Sangma-ni dolko maning action ra•jaha.
Apsandake re•anggipa March 11 tariko Ronjit Sangma aro Michael Marak-ni dolrang Jimbirth Sangma aro Kenedy Marak-ni bagan jangchiko a•ba o•e, a•ba so•enba bang•a ge•gimin guerangko kamataha. Uni bidingo ka•jia ong•taie dolgni jegrikanirang ong•enba Kenedy Marak-ni manderangko Ronjit Sangma aro Michael Marak-ni manderang den•na su•na am•ani gimin March 14 tariko Kenedy Marak Jengjal Pulis Station-o badi ka•taiaha, indiba Jengjal PS-ni officer in-charge ra•chakjaha. Uni ja•man March 16 aro 17 tarikrango Ronjit Sangma aro Michael Marak, Kenedy Marak-ni kosako badi ka•akosa Jengjal PS-ni officer in-charge ra•chake, Kenedy Marak aro gipin sak 5 manderangko March 18 tariko Jengjal thana-ona phone ka•e aganatenba, maming a•sel gri uamang sak 6-ko rim•e pattoko donataha, da•onaba pattoko dongenggipa Gondenggre songni sak 6 manderangko jamin (bail) on•kuja ineba Rettina Marak parakataha.Indakgipa obostarang Gondenggre songo a•ana kajia golmal ka•e so•sojengjeng ong•ani kosako dos grigipa manderangko rim•e pattoko donatahani gimin Ma Marak suk ong•gijaniko parakataha.
Indake ong•engon, Ronjit Sangma aro uni dolrang an•tangtangni dosko janggilchi donnue songbad-rango seataniara bebe ra•na amgijani ong•a aro ia kajiani bidingo sandigenchimode, sawa kakket aro sawa tol•a ma•sina man•gen. Gondeng-ni nokdangoni Nokma ong•anggiparangni biminrang chu•gimik lekkao segate rakkigipa da•onaba gimakuja. Uni gimin ia sakkirango pangchake, chinga Gondeng-ni su•drang dedrang, Gondeng Sangma-ni kange bile donanggipa Gondenggre A•kingni a•bi-tot 77-ko maming dakeba gipinna on•jawa ineba Ma Rettina Marak a•kangatskaha.