Tura, April 1, 2022: GSU Western Zone North Dadenggre-ni ning•o donggipa GSU Phulbari Regional Unit-ni Eleksin Commission March 29 tariko songni Nokmarang, Skullni Skigiparang, Phulbari Garo Students Committee (PGSC)-ni memborrang aro GSU WZ North Dadenggre-ni dilgiparang tom•aniko ong•ate GSU Phulbari Regional Unit-o Eleksin ong•atna gita tik ka•angaha. Eleksinko ong•atna miksonganiara batanggimin salrango songbadrango aro Social Mediarango tol•e jangmikbranggipa kattarangko niksoe manderang uko bebe ra•enba so•sojengjeng ong•angaha, uni gimin chinga Eleksinko ta•raken ong•atanggen ine Eleksin Commission u•iataha.
Je mandean chu•onga gita bida donge, jattangna aro a•doktangna ka•sae an•tangko on•kange kamko ka•angachim, April 6 tarikna skang Phulbari Returning Officer Benethson R. Marak-ni office-ona re•ange eleksino susana gita an•tangni bimingko segate donena man•gen. Eleksino susana biming segatgipa manderangni gimin tal•e ma•sina gita April 8 tariko Phulbari Water Resources-ni IB-o nirok sandianggen ba Scrunity-ko dakanggen.
Uandake Eleksinko April 22 tariko Phulbari Shyamnagar Secondary Skulo ong•atanggen aro apsan salon vote-rangko chan•ne chegipa candidate-ni bimingko parakatjolgen ine u•iataha.