Tura, April 5, 2022: Federation of Khasi Jaintia and Garo People (FKJGP) Garo Hills Zone, Meghalaya New and Renewable Energy Development Agency (MNREDA)-ni Project Officer, Jawairiya Islam-ni kosako jegale, uko ta•rake kamoniko ra•galchina dabie West Garo Hills a•jani DC-ni jak gita MNREDA-ni Director-na lekka sedoataha.
FKJGP-GZ-ni Additional General Secretary, Matsrang A.Sangma-ni u•iatani gitade, Rafiqul Islam-ni demechik Jawairiya Islam-ko maming sorkarini niamko ja•rikgija, MNREDA-ni Assistant Director, West Garo Hills-ni Project Officer dake MNREDA-ni ning•o kam rakkiahachim.
Meghalaya sorkarini ning•o bang•a dingtang dingtang kamrang aro gipin sorkarini bilko man•gipa corporation-rang aro Agency-rango dongimin niamrangko ja•rikgija skatang kamo rakkianirangko FKJGP raken jegalataha.
Ua kamni gimin songbad-rango, electronic mediarango aro office-ni notice board-o advertisement ka•a dongja aro kamna porikka ra•a ba personal interview-ko ra•a dongja.Jawairiya Islam-ko ua kamo rakkina maming dakeba kraja, ua kamna kragipa aro changgipa sapgipaba ong•ja, ua kamko ka•na komibeoba electrical-ni bidingo ma•sigipa aro ba electrical-o Bachelor in Engineering-ko pass ka•gipa ong•na nanga. Jawairiya Islam, Guwahati University-o Socialogy BA-kosan poraie matchotaha, uni gimin ua kamko ka•na kraja ineba FKJGP jegalataha.
Jawairiya Islam-ko ia kamo ong•gija dake rakkianiko FKJGP ra•chakna man•jawa. Project Officer ong•e kam ka•engon, songtangni ku•sikko name ma•sia baksana aganna man•gipa ong•na nanga aro West Garo Hills-ni dingtang dingtang biaprangona re•ange, Agency-ni gita nina aro data-rangko chimonge, songni manderang baksa agangrikna man•gipa ong•na nanggen. Uni gimin ua me•chik officer-ko ta•rake kamoniko ra•galsrange, gital advertisement-ko ka•e sorkarini dongimin niam gita ua kamna kragipa mandeko seokchina FKJGP dabiangaha.