Tura Medical Kolege-ko rika matchotgija galchipe donani gimin AHAM sing•doa
Tura, April 25, 2022:A•chik Holistic Awakening Movement (AHAM) HQ, Tura adita salna skang Tura-o rikenggipa Medical Kolege-ko re•ange nieaha.
AHAM dilgiparangni re•ange nianio nikna man•ani gitade, A•chik A•songna mikim rasongko ra•banagipa ge•samangmang Medical Kolege aro A•chik a•songni skia poraini gadangko tang•doatnagipa aro A•chik A•songna on•gimin Medical Kolege ong•achim ine parakataha.
AHAM, HQ-ni President George Prince Momin-ni parakatani gitade, ia Medical Kolege building nokko bilsi brina skang Shapoorji Pallongji Private Company Limited a•bachengataha, indiba ia company ja•mano gipin ge•gni sub contractor-rang Dhar Construction Company aro VSS Company-na kamko on•aha. Beben ia ge•gni sub contractor-rang kam on•ani ja•mano building rikna a•bachengaha. Ua contractor-rang building nokni mongsonggipa krongrangko songdoaha aro mittam building nokrang 50% matchotani ja•mano, Shapoorji Palongji Company, Sub Contractor-rangna tangkarangko on•jani gimin sub contractor-rang Tura Medical Kolege-ko rikgija galchipe kataha.
Indiba ua buildingko rikgipa quality dongja ine parakataha.
Contractor-rang building rika matchotgijan tangka man•aiama, ma running bill man•jaode building rikaniko galchipe katna Company Agreement dongama aro running bill man•jaode galchipe katna bil man•ama ine George Prince Momin sing•doangaha.
Da•alo, angni sing•anide ia Delhi Base Company-ara sawa aro maini gimin Sub Contractor-na kamko on•aha.Ia Sub-Contractor, Dhar Contrction Company aro VSS Company-ara maina Sub Contract ra•e kam matchotgija galchipe kataha. Ma A•chik a•songni development-ko indakeba kal•ake rona man•ama, sawa ia Company-ara aro banoni aro jinmani tangkako indakeba rusie galna man•aiama. Iako nirok simsakaniara sani daito ong•achim ineba sing•doangaha.Iara a•dok sorkarini negligence-ma,ma Contractor-rangni negligence-sama.Building rikani namrorogenchimode,
da•o ia Medical Kolege building nokrang matchotna bang•jawahachim, indiba bilsi bonga gapilona kingkingba indaken galchipe donenga ine Momin suk ong•gijaniko parakataha.
Ia Medical Kolege-ara A•chik A•songni gam ong•a. Uni gimin a•dok sorkari ia Medical Kolege-ko ta•rake matchotatna nanga aro simsak nirokatna nangchong•mota. Contractor-rangko blacklist ka•na nanga aro tangka paisani gita choligipa aro bil donggipa Contractor-nasa ia kamko on•na nanga. Uni gimin ia kamko ta•rake chu•sokatjaode, chinga nie dongjawa, nanga ong•ode High Court-ni dogako doktikgen ineba Momin mikkrakatangaha.