Tura, April 26, 2022: Federation of Khasi Jaintia and Garo People (FKJGP) Garo Hills Zone, West Garo Hills a•jani Deputy Commissioner-ni jak gita Meghalaya New and Renewable Energy Development Agency (MNREDA)-ni Director-na gisik ra•atpiltaiani lekkako seattaiaha.
FKJGP-GZ-ni Vice-President Rohit R.Marak-ni u•iata gitade, re•anggipa April 4 tariko MNREDA-ni Project Officer Jawariya Islam-ko kam ra•galchina dabie MNREDA-ni Director-na lekka seatahachim, indiba da•alona kingkingba maming aganchakaniko on•kujaengani gimin, changsatai gisik ra•atpiltaianiko dake Monggolbar salo DC-ni jak gita lekka sedoattaiaha.
“WGH a•jani MNREDA Department-o Jawariya Islam-ko Project Director-ko niam gri kamo rakkianiko jegala aro ia obostani bidingo chinga April jani 4 tariko Deputy Commisioner-ni office-ona re•ange badi ka•aniko dakaha. Islam-ko Project Director-ni kamo rakkianiara niamni kosako kamko ka•ani ong•a. Ia kamo vacancy donga ingipa kattako songbad-rango social media-rango aro office-ni notice board-o janapata dongja. Una agreba Department-ni gita maming interview-rangko ra•aba dongja. Kamo rakkiako man•gipa Jawariya Islam ia kamna chu•onga gita bida dongja aro ia kamko ka•na gita Bachelor in Engineering (Electrical)-ko matchotna nanga. Indiba Jawariya Islam-ni poraia gadangde Bachelor in Sociology (BA)-kosa Guwahati University-o poraiaha. Project Officer-ni kamko ka•na Garo ku•sikkoba name ma•sigipa ong•na nanggen, maina Project Director-ni kamde Project-rangko nirok sandina, Data-rangko chimongna aro songni nokni manderang baksa agangolpogrikna ong•na nanga. Indiba ia kamo rakkiako man•gipa Islam-de Garo ku•sikko agana man•ja” ine FKJGP Garo Hills Zone janapataha.
“Chinga a•doko indake niamni kosako kamko ka•enggiparangko jrip nie rojawa, Project Officer-ni kamna kraa mandekosa rakkina nanga aro niam gri kamo rakkianiko man•gipa mandeko ta•raken kamoniko ra•galna nanga” ineba FKJGP dabiangaha.
Uni gisepon “Chingni dabianiko knachakja ong•ode, chinga Democracy-ni bewalo pangchake raka sinjetanirangko dake dingtang dingtang jingjengatanirangko dakanggen” ine FKJGP Vice-President parakataha.