Tura, April 26, 2022: GHADC-ni Deputy CEM Nikman Ch.Marak Monggolbar salo a•dokni Skotong Minister Conrad Sangma-na mol•mole lekka sedoataha.
Nikman Marak-ni janapatani gitade, Central University-rango admission man•na gita pilak poraienggipa chadamberangan Central University Entrance Test (CUET) porikkako sena gita nanggnok ine knasamsoaha.
Indake ong•engon, NEHU-o an•ching Schedule Tribe-rangna seat reservation 75.5% san dongaia. An•ching Meghalaya a•dokko man•chengaoni an•chingna reservation policy gnang, indide NEHU-o 7.50% mangmangsan reservation-ko donaniara Schedule Tribe-ko kal•steka gita ong•an baksana dal•e ra•ja.CUET porikkako indita lakni lak chadamberang segen, indiba reservation-an komigenchimode, uamang maikai mikkangchi poraidapangna chol ong•gen ineba u•iataha.
“CUET porikkako SC,ST,OBC aro bang•a dingtang dingtang category-o ga•akgipa manderangna neng•nikani ong•a. Bang•a ma•a paarang chol dongpajaoba dedrangni chu•sokako nikna ske gramchi ong•e jotton ka•stapenba dakchakaniko on•a.Indiba reservation policy-an komigenchimode aro CUET-ko pass ka•jagenchimode, uamang maikai NEHU-o affiliate ka•gipa kolege-rango admission man•pagen. CUET porikkako sena gita bang•a chadamberang neng•nikaniko man•gen, maina Meghalaya a•dokni pilak skulrangan MBOSE-ni Syllabus-kosa ja•rika. Indake ong•anichi poraienggipa chadamberang tuition aro coaching class-rangko ra•na nanggnok aro ian dongpagija poraienggiparangna namen neng•nikani ong•a.Ia obostani bidingo nirok sandina nangchongmota aro Ma•mong Sorkari baksa agangolpogrikna nanga. An•ching a•dokni Human Resource Department (HRD) jean gipin a•dokrangko toatgenchimode, ja•manchakbatgipa ong•enga iako ra•dona aro namdapatna raken jotton ka•na nanga” ine Skotong Minister-ko mol•molataha.