Shillong, Sep 15: Ru•uta bilsirangoni rikna a•bachengatenggipa Tura medical kolege-ko rika 33 percent matchotaha aro koros ong·a 17 percent ong·aha ine Bristibar salni Autumn Session-o, Health Minister Pa James Pangsang K Sangma parakataha.
Ia Tura medical kolege-ko rikani 2021 bilsini January 27 tarikon matchotatna manchiaoahachim, indiba COVID sabisini a•sel ia kolege-ko rikanio ja·manchakaha ineba ua parakataha. Indake ia medical kolege-ko rikenggipa company, somoiko bi·dapani gimin, sorkari ia kolege-ko re•baenggipa 2023 bilsini February 7 tariko matchotatchina somoiko on·dapaha ine Pa Sangma parakataha.
Tura medical kolege-na gong kror 243.82-ko chamatahachim, indake ianoni gong kror 172-ko India sorkari on·atna am•enga. Indiba da·odipet Tura medical kolege-ko rikanio gong kror 41 koros ong·ahani gimin, chu·gimik koros ong•a 17 percent gapaha ineba Health Minister parakangaha.
Indake ong•engon, Shillong medical kolege-ni bidingo Nongkrem MLA Lambor Malngiang-ni sing·anina aganchakengon, Shillong medical kolege-ko rikna gita gitcham MoU-ko den·galpilani ja·mano sorkari da•o PPP mode-na gital dolrangko okamenga ineba parakataha. Shillong medical kolege-ko New Shillong Township-o rikna sorkari a•a acre 50-ko on·aha ineba Pa Sangma parakataha.