Ramao naljokaniko on•na rakgipa niamko ra•gatgen:Tynsong  

0

Shillong, Sep 15, 2022:A•dokni Deputy Skotong Miniater Preston Tynsong, Ampati-oni Zikzak gita Mahendraganj-ona aro Garobadha-oni Purakhasia gita Dalu-ona dakanggipa ramako tarina a·dok sorkari tangka gong keor 4.42-ko chamataha aro ia apsan ramako National Highway (NH) tarina ma·mong sorkarina proposal-ko on·atna miksongenga ine parakataha.

A•dokni PWD Minister Preston Tynsong Bristibar salo jinmana parakatani gitade, ia ramako tarina a·dok sorkari, gong kror 4.42 tangkarangko chamaha aro gong kror 5.29 tangkako on•dapatna miksongenga ineba parakangaha.

Assembly-o Salmanpara MLA Winnerson D Sangma-ni sing·anina aganchakengon, ia ramara dilsa a·kawe jolo mongsongbatgipa rama ong·a aro ia ramako NH tarina gita ma·mong sorkarina proposal-ko on·na miksongenga ine parakataha.

Tynsong-ni parakata gitade, kilometre 98 chel•gipa ramako 2018 bilsio gong kror 250 koros ong·aha aro ia ramako nirokna gita contractor baksa songgigrikani 2019 bilsion bon·aha. Uni gisepon ia rama gita Bangladesh-ona ro·ong salruragipa truk garirang sal wal re·ruraengani a·sel rama nosto ong·batenga aro bang•bata ramani bakrangan jakasichipak nosto ong·bataha ineba PWD Minister parakataha.

Unbaksana ia rama gita nangana bate bosturangko salgipa truk garirang re·ruraengani gimin Rangsakona-ni MLA Zenith Sangma janapatenba ia rama gita bosturangko salgipa truk garirang metric ton 12-na bate salna on·jagenchimoba, truk garirang manigija metric ton 42-oni 48-na bate salskaenga ine parakataha.

Ia rama gita truk garirang skatang simsakgija ta•rakprete salruraengani a·sel bang·a manderangni janggirang gimaaha ine janapatengon, indake simsakgija skatang salaniko champengna rakgipa niamko donatchina Zenith Sangma, sorkariko didiangaha.

Zenith Sangma-ni sing•anina aganchakengon, bosturangko salna gita truk garirangna dongimin dingtang dingtang niamrang donga ine PWD Minister, talataniko on·angenba, ia ramani nosto ong·aniko sandina gita technical dolko ge·etanggen ine ku·rachakangaha.

Sorkari ramao a•sel ong•anirangko naljokatna rakgipa niamrangko ra•gate on•anggen ineba Tynsong parakangaha.

Leave A Reply

Your email address will not be published.