Tura, September 15, 2022: A•songni Election Commission-ni 2021 bilsini December 30 tariko Representation of People’s Act, 1950 Amendment-ni bidingo jinmana u•iataniko on•angaha. Indake West Garo Hills a•jani District Election Officer, Section 23-o tarigimin Amendment-o pangchake, Eleksin ID Card aro Aadhaar card nombor-ko nangrimatna aro link ka•na nanggnok ine u•iataha.
26B Special Provision-o janapani gita, je manderangan, Eleksin ID Card gnangchim, uamang Aadhar card nombor baksa nangrimatna ba link ka•na nanggnok. Unbaksana je manderangan Eleksin ID Card-ko tarina nisengsoengachim, uamangba Aadhar nombor baksa link ka•na nanggnok. Eleksin ID Card donggimin manderang Form 6B-o Electoral Registration Officer-ona re•ange Section 23-ni sub-section (5)-o pangchake gapatna nanganirangko gapate, Aadhar nombor baksa nangrimatna man•gen aro ia niamko August 1 tarikoni ra•gataha ineba parakataha.
Uni gimin Electoral Registration Officer, Electoral Roll-o biming donggipa sakantini Aadhar nombor-rangko sandienba Eleksin ID Card baksa nangrimatna nanggnok. Re•anggipa June 17 tariko jinmana u•iataniko on•ani gitade, elektoral roll-o biming donggipa sakanti manderangni Eleksin ID Card aro Aadhar nombor-ko 2023 bilsini April 1 tarikna skang matchotatna nanggen.
Indake Aadhar Card-ni nombor baksa nangrimatna dingtangmancha jinmani u•iatanirangko chu•gimik segatna gita Form 6B-ko ra•gataha. Aadhar nombor-rangko nangrimatna gita August jaoni form-rangko gapatna a•bachengataha. Eleksin ID Card aro Aadhar nombor-ko nangrimatna miksonganiara, elektoral roll-o changni chang segatanggimin apsan mandeni bimingrangko den•gale galani ong•a.
Election Commission Electoral Roll-o donggipa manderangni bimingrangko sakki man•na gita Booth Level Officer-ko kamo rakkiaha.
Je manderangan Aadhar card dongjachim, uamang Form 6B-o janapgimin gita sakkina gipin document-rangko on•skana nanggen. Je manderangan Aadhar Card aro Eleksin ID Card-ko nangrimatna gongjaengchim, uamang Aadhar nombor-ko on•gija gipin document-rangko on•skana man•gen aro darangkoba Aadhar nombor-ko on•telna nanga ine drana man•jawa.
On•na man•gipa gipin document-ranga, MGNREGA Job Card, Bank Passbook, Ministry of Labour Scheme-ni gita sualgipa Smart Card, Driving Licence, PAN Card, NPR-ni ning•o RGI-ni sualgipa Smart Card, Indian Passport, jachipchang gnanggipa Pension Document, ja•chipchang gnanggipa Service Identity Card, jekon kam ka•enggiparangna Central/State Govt/PSUs/Public Limited Companies, MP/MLA/MLC-rangna sualgipa Official Identity Card, Unique Identity ID (UDID) Card jekon M/O Social Justice and Empowerment sualahachim, ia document-rangko sakkina on•skana man•gen ineba u•iataha.