Tura, September 17, 2022: West Garo Hills a•jani Tura Industrial Training Institute (ITI)-o Convocation Ceremony-ko Sonibar salo ong•atangaha.
Ia tom•anio WGH a•jani Additional Deputy Commissioner W R G. Momin mongsonggipa sokgipa ong•e chakkiko so•achi manianiko oprake on•angaha. Unbaksana Trazie R Marak rimchaksoani kattarangko agananga baksa ITI-o skie ra•enggipa chatro chatrirang knatogipa ku•rangchi gitrangko ring•e jinmako rimchaksoaha.
Inake ia tom•anio K N Marak, ITI-ni ong•baaniko aro gamchataniko jinmana aganangaha. Uandake Additional Deputy Commissioner W R G. Momin-ba skie ra•enggiparangna nama ku•pattianirangko on•angaha.
Indake Convocation Ceremony-ona dingtangmancha okamatako man•gipa MSME-ni Assistant Director, N Trivedi-ba dongpae jinmana aganprakangaha.
Gipin sokbagiparanga ITI-ni gitcham Principal N W. Momin, MeECL Department-ni Additional Chief Engineer aro Chairman A F G. Momin mangba bakko ra•angaha.
Indake Valedictory speech baksana award aro certificate-rangko Pringche Ch. Marak sualangaha. Bon•kame D Kharshing mittelpilani kattarangko aganne tom•aniko matchotataha.