Tura, Sept 17, 2022: West Garo Hills a•jani Gambegre block-ni ning•o donggipa rama jal•langrang namjani gimin, songni bang•a manderang September 17 tarik Sonibar salo Gambegre kal•chakram biapo jinma tom•e chanchirimangaha.
Ia tom•aniko Gambegre Area Development Society (GADS)-ni gita ong•atenba, Tura-oni Purakhasia-ona dakanggipa mongsonggipa rama, Darengre-oni Bolsrem-ona aro Gambegre-oni Mellim-ona dakanggipa PMGSY ramarangko ta•rake taripile on•china dabiangna miksonganio GADS-ni Chairman Benjamin Marak chanchidilangaha.
Indake ia tom•anio GADS-ni dilgiparang a•dokni Skotong Minister Pa Conrad Sangma aro Gambegre-ni MLA Pa Saleng A.Sangma-ko ta•rake ia ramarangko taripile on•china mol•molangaha.
Ia tom•anio bang•a NGO-rang jekai GSMC, AYWO, Nokma, Laskar-rang, VEC-ni dilgiparang aro gipin dilgiparang bakko ra•anagaha ine GSMC-ni dilgipa Bostone Sangma u•iataha.