Resubelpara, Sept 18, 2022: Prime Minister Narendra Modi-ni atchiani salko September 17 tariko kusi ong•e manitokengon, Meghalaya Pradesh Youth Congress (MPYC), Sonibar salo namnikgijaniko mesokna Mendipathar Congress Bhavan-o National Unemployment Day (NUD)-ko maniangaha.
BJP aro MDA sorkari kam gri dongenggipa chadamberangna kam on•na man•gijaengani gimin, Narendra Modi aro Conrad Sangma-ni kosako jegale namnikgijaniko mesokna Narendra Modi-ni atchiani salo National Unemployment Day-ko maniangskaha.
MPYC dilgiparangni parakatani BJP sorkari India-ko sason ka•a bilsi 8 ong•aha, indiba chadamberangna kamrangko on•na man•gija da•alona kingking donengani gimin, Modi sorkarini kamna MPYC suk ong•gijaniko parakataha. Apsandake Meghalaya a•dokoba bang•a chadamberang poraia matchoteba kam gri dongna nangengani gimin MDA sorkarini kosko MPYC jegalangaha. A•doko bang•a vacant postrang donggenchimoba, ua vacant postrango MDA sorkari appoint ka•gija donengako nike, ua kamrango basako gapatgen aro ua kamrangko sana donskaenga ine North Garo Hills-ni District Youth Congress (DYC), President Timjim K.Momin sorkario sing•doangaha.
Ia National Unemployment Day-ko maniaona bang•bea chadamberang re•bae bakko ra•angtokaha.
Timjim Momin-ni parakatani gitade, bilsianti unemployment ba poraia matchote kam gri dongenggipa chadamberang Meghalaya a•doko batroroenga. Uni gimin MDA bangbang dongenggipa vacant post-rango ta•rake kragipa aro changgipa sapgipa candidate-rangko basee kamo rakkina nanga ine MPYC dabiangaha.