Tura ISBT-o gari parking fee ra•aniko dontongatchina GSU DC-na lekka sedoa
Tura, June 13, 2022: Garo Students Union (GSU) CEC, Tura Sombar salo Inter State Bus Terminus (ISBT)-ona mande salbagipa garirang auto, scooter, bike, car aro gipin garirangoniko parking fee ba tangka gilaniko dontongatchina dabie DC-na lekka sedoangaha.
GSU CEC, West Garo Hills a•jani Deputy Commissioner, Swapnil Tembe-na lekka sedoatanio janapatani gitade, Tura ISBT-o dongipa bus garirango songre songgabatna manderangko salange dikdiksa dongdipenggipa private garirangoniko tanga gilaniko ta•rake ra•galchina DC-ko didiataha.
Tura ISBT-ni napram cholgugao mande sale donbagipa garirangoniko tangka gilrikaniara jinmana neng•nikaniko ra•baa ine GSU CEC-ni Assistant General Secretary Salman D Sangma parakataha.
“ISBT-ona mande salanggipa gari bolprakoniko tangka gilrikenga. ISBT-ona manderangko salange dikdiksa somoina garirangko donenga. Ia obostani bidingo nirok sandina nangchongmota aro manderangni neng•nikaniko nigrike mande salanggipa garirangoniko tangka gilrikna nangja” ineba Salman Sangma janapataha.