Tura, June 13, 2022: Raksamre elekka-ni MLA aro gitcham GHADC-ni CEM Benedict R. Marak re•baenggipa 2023 bilsini Assembly eleksino All India Trinamool Congress (AITC) doloni susaskagen ine parakataha.
“National People’s Party (NPP) dol ticket on•na jechakaniko man•ne, Raksamre Elekka-ni MLA Benedict R. Marak All India Trinamool Congress (AITC) doloni re•baenggipa eleksino susaangskagen. Sonibar salo NPP dol Benedict Marak-na ticket on•na jechakgenba, Raksamgre-ni gitcham MLA Limison D Sangma-na ticketko on•skana miksongenga. A•dokni Skotong Minister Conrad Sangma Sonibar salo Limison D Sangma, NPP doloni Raksamre elekkao susaanggen” ine parakataha.
Koborko man•soani gitade, Selsella Elekka-ni NPP MLA Ma Ferlin C.A Sangma doltangoni ong•katenba, United Democratic Party (UDP) dolo susaangskagen. A•dokni Skotong Minister Conrad Sangma, skang salrangoba Selsella Elekka-ni MLA ong•ahani gimin NPP dolni ka•rimskarang uko Selsella Elekkaoni chakatpiltaichina didienga ineba u•iataha.
Batanggimin salrango Meghalaya Assembly-ni Speaker aro UDP dolni President Metbah Lyngdoh, “Gipin Politikal dolni sak 6 MLA-rang UDP dolona napbbaenba re•baenggipa 2023 bilsio UDP dolni gita susaanggen” ine parakataha.