Baghmara, June 13, 2022: South Garo Hills a•jao Chokpot Civil Sub Division-ko songahaoba maming namdapatani dongja ine GSU Chokpot Regional Unit, parakataha.
Bimingna Chokpot Civil Sub Division-ko songe on•aha, maming namdapani dongja aro Sub Division-ni kri ge•saba office building nokrang dongkuja ine GSU janapataha.
Chokpot Civil Sub Division ong•oba Sub Division-ni ning•o donggipa sorkari office-rang dongja, iako sorkari ta•rake namdapatna nanga aro chu•gimik office nokrangko rike kamrangko ka•na nanga ine GSU dabiangaha.
South Garo Hills-o ge•sa mangmang donggipa Civil Sub Division-ko sorkari ru•uta bilsirangna maming kam gri galchipe donenga, Chokkpot Civil Sub Division-ko man•ani bilsi 6 batangpiloba mamingan dongkuja, ian a•dok sorkarini gisiko nanggijani kamko mesokaha. Batesa gital Sub Division-ko namdapatna nangachim, indiba a•dok sorkari politically nikchanggalaha, a•dokko namroro silroroatna party hisapgija, jatni namgnina development-ko ra•bana nanga ineba GSU Chokpot Unit janapataha.
Chokpot rona rotogipa biap ong•a, tourist biaprangba South Garo Hills-o bang•batgipa ong•a. Indiba tourism-ko namdapatani pal batesa ong•siatenga. Garo Hills-o Tourism-ko tang•doatna man•ode, jolni manderang namgipa janggi tangani cholrang sokbagenchim, indiba sorkari A•chik jatni janggi tanganiko namdapatna sikjani a•selsa Chokpot gita dakgipa biaprangko galchipe donenga ine GSU matnangataha.
Chokpot Civil Sub Division-ko namdapate on•genchimode, baditan Chokpot jolni manderangna janggi tanganio dakchakbeani ong•genchim. Uni gimin mikkangchi indake Chokpot Sub Division-ko galchipe donangaikuode, GSU Chokpot Regional Unit, nie dongchajawa dingtang ja•kurangko de•e sorkarini kosako rakgipa sinjetanirangko dakangskagen ine GSU Chokpot Regional Unit-ni General Secretary Tangke R.Marak parakataha.