Tura, November 17, 2022: West Garo Hills a•jani ning•o donggipa Rajabala elakkao, Meghalaya Trinamool Congress (TMC) Monggolbar salo tom•aniko ong•atangaha.
Ia tom•anio Trinamool Congress dolni dilgipa Dr Mukul Sangma, Rangsakona elakka-ni MLA Zenith Sangma, Balachanda elakka-ni MDC Agassi Marak, Meghalaya Pradesh Trinamool Congress Committee (MPTCC)-ni Secretary Alhaz Abdul Hussain, General Secretary Mukul Das, Rajabala elakka-ni TMC dolni dilgipa Dr. Mizanur Kaziwere bakko ra•angaha.
Dr. Mukul Sangma jinmana aganprakengon, “An•ching pilakan Democratic Rights-ko jakkalna bil donga. A•songko sildapatna aro namdapatna gita an•ching Democratic Rights-rangko jakkalna man•a. MDA sorkari a•doko mande so•otani, rim•srukani aro bobil dolrang namen Komiaha ine Assembly-o agananiko dakronga. Indiba tom•tomaniko sawa ra•baaha? Angni Chief Minister ong•miting somoio chinga a•doko tom•tomaniko ra•bana rakbee kamrangko ka•aha, jeni bitekon da•o man•genchimoba gipin dolrang uko bisongni kamni a•selsa ine rasong de•enga. Bangladesh Liberation-ni ja•mano Border Haat-rangko chiptokaha. Indiba angni somoio anga Haat-rangko kulipiltaiaha, anga an•tangan haat ge•gniko oprake on•aha, jedakode manderang bading chiwale cha•na gita man•pagen. Indiba MDA sorkarini ning•o, Nepotism aro Favouritism biapko ra•sekaha, uamangni bakdil aro ripeng skarangsan haat gita badingchiwalna raiko man•aha” ine aganangaha.
NPP dolni data survey-koi niatengenchimode, uamang Garo Hills-o ge 5 ba ge 6 elakkarangon chena man•awa ineba ua agandapangaha.